Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 109 Hüküm no: 72 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Yorgi’nin tarlasının kullanım hakkını İsteryanos v. Todori’ye devretmesi Vilâyet-i Rumeli’nde İnebahtı sancağında Yenişehir kazâsı Fener nâhiyesine tâbi‘ Tomyani nâm karye sâkinlerinde Dimitri v. Yorgi nâm [zimmî] işbu hâmil-i hâze’l-kitâb İsteryanos v. Todori nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip karye-i mezbûre sınırı dâhilinde Çavdar tarlası demek ile ma‘rûf bir kıt‘a tarlamın ve yine bir tarafdan Dimitri v. Nikola tarlasına ve bir tarafdan kayaya ve iki tarafdan dereye müntehî ve mahdûd taht-ı tasarrufumda olan bir kıt‘a tarlanın hakk-ı tasarrufunu sâhib-i arz ma‘rifetiyle merkūm İsteryanos’a tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan iki bin nakd-i fıddî râyic fi’l-vakt akçeyi mezbûr İsteryanos’un yedinden ahz ve kabz eyledim ba‘de’l-yevm sâlifü’l-beyân tarlaların hakk-ı tasarrufları merkūmundur, sâir emsâli tasarrufu gibi keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr İsteryanos bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’ş-şehri’l-mezbûr li târihi’l-mezbûr. Şuhûdü’l-hâl: Ali b. Abdullah, Mustafa b. Mehmed, İsteryani [v.] Harke v. Yani, Todori v. Moriki, İskarlet v. Yorgi, Yorgi v. İstiranik, Hristo v. Liko ve gayruhüm mine[’l-hâzırîn].