Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 108 Hüküm no: 71 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan Bey b. Abdullah’ın bazı emlâk hisselerini Haydar b. Hasan’a satıp tarlalarının da kullanım hakkını devretmesi Vilâyet-i Rumeli’nden Avlonya sancağında Premedi kazâsına tâbi‘ Surpoli nâm karye sükkânından Sinan Bey b. Abdullah nâm cündî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Haydar b. Hasan nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Mehmed b. Karagöz mülküne ve bir tarafdan yine müşterî-i mezbûr mülküne ve bir tarafdan Minho v. Palko mülküne ve bir tarafdan tarîk-i âma müntehî iki tahtânî beyti ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilden ve karye-i merkūmede vâki‘ bir kıt‘a harman yerinden ve bir kıt‘a samanlık ve karye-i merkūme kurbunda mevâzi‘-i adîdede vâki‘ bir kıt‘a mülk bağdan nısf hisse-i şâyi‘alarımı, cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Haydar’a beş bin nakd-i fıddî-i Osmânî râyic fi’l-vakt akçe[ye] bâtten bey‘ ve kabz-ı semen edip mebî‘ât-ı mahdûdeyi mahallinde kabza müşterî-i merkūmu taslît eylediğimden sonra yine karye-i merkūme sınırında vâki‘ her biri inde ahâliyi’d-diyâr ma‘lûmü’l-hudûd ve’l-mikdâr sekiz kıt‘a mutasarrıf olduğum tarlanın dahi hakk-ı tasarrufunu mezbûra tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan üç bin nakd-i mezbûrü’n-na‘t akçeyi mezbûr Haydar yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd ve bağ ve harman ve samanlıkdan nısf hisse-i şâyi‘alarım mezbûr Haydar’ın mülk-i müşterâ-yı sarîhidir ve mârrü’z-zikr sekiz kıt‘a tarlanın dahi hakk-ı tasarrufu mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Haydar bi’l-muvâcehe tasdîk edicek gıbbe’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ahmed Beşe b. Abdullah er-Râcil, Mehmed b. Karagöz, Ali Beşe b. Abdullah er-Râcil, Ali Beşe b. Mustafa er-Râcil, Ali b. Turgud, Osman b. Turgud, Mehmed b. Mustafa, Süleyman b. Turgud, Yakub b. Kurd.