Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 110 Hüküm no: 74 Orijinal metin no: [12a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. Murad’ın evini Hüseyin Çelebi Vakfı’na istiğlâl yoluyla sattığı Mahmiye-i Kostantıniyye mahallâtından Mustafa Paşa mahallesinde sâkine olan Sâime bt. Murad nâm zevcesi kıbelinden âtiyyü’z-zikr menzilin bey‘ ve istîcâr ikrârına vekâleti Mehmed b. Haydar ve Hüseyin b. Veli nâm kimesnelerin şehâdetleri ile sâbit olan Silahdar Mehmed Bey b. Mustafa nâm kimesne meclis-i şer‘-i şerîfde müvekkile-i mezbûresinin menzilini Turşucuzâde deyû meşhûr merhûm Hüseyin Çelebi vakfı’na mütevellî olan hâmil-i hâze’l-kitâb Hüsrev b. Abdullah’a bey‘ ettiğini ikrâr ve i‘tirâf etti. O da vakf-ı mezbûr malıyla ve istiğlâl için mezbûre Sâime hâtunun iş bu akdin kendilerinden sudûruna kadar sâhibi ve mâliki olduğu elinde ve taht-ı tasarrufunda bulundurduğu mahalle-i mezbûrede kâin ve bir tarafdan mezbûrenin oğlu Mustafa b. Hüseyin mülkü, diğer tarafdan merhûm Toklu Dede zâviyesi ve tarîk-i âm ile mahdûd menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yirmi iki bin akçe-i Osmânî semen-i mu‘ayyen-i makbûzla andan iştirâ etti. Bâyi‘a-i mezbûrenin menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyilde mezkûr senenin gurre-i Muharrem-i harâmından bir sene tamâmına iki bin iki yüz akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mezbûre-i merkūmenin sadrî oğlu Mustafa b. Hüseyin menzil-i mezbûrun derkine ve asl-ı meblağ-ı mezbûra ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’r-râbi‘ li şehri’l-mezbûr ve târihi’l-mezkûr. Şuhûdü’l-hâl: Mustafa b. Muharrem, Mehmed Halîfe b. Mahmud, Ali b. Kasım, Hamza b. Mahmud, Hüseyin b. Ahmed, Mehmed b. İlyas, Mehmed b. Hanefi, Yakub b. Kurd, Süleyman b. Turgud ve gayruhüm mine’l-hâzırîn.