Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 110 Hüküm no: 75 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Eşref’in tarlalarının kullanım hakkının varisleri tarafından Sefer b. Vildan’a devredilmesi Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Bıçakçıbaşı mahallesi sükkânından iken bundan akdem vefât eden Hasan b. Eşref nâm kimesnenin verâseti, sulbî sagīr oğulları Hüseyin ve Ahmed’e münhasıra oldukdan sonra sagīrân-ı mezbûrânın kıbel-i şer‘den mansûbe vasiyy-i şer‘îleri olan Mülâyim bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb Sefer b. Vildan nâm kimesne mahzarında bi’l-vesâye ikrâr ve takrîr-i kelâm edip vilâyet-i Anadolu’da Bolu sancağında Gölpazarı kazâsına tâbi‘ Kızılelma nâm karye sınırında vâki‘ babaları merhûm-ı mezbûrdan sagīrân-ı merkūmâna bi hasebi’l-kānûn intikāl eden bir tarafdan Nasuh Efendi b. Ahmed tarlasına ve bir tarafdan Osman b. ( ) tarlasına ve bir tarafdan yine mezbûr Sefer b. Vildan tarlasına ve bir tarafdan tarîk-i âma müntehî olup her birinin beher sene sekiz akçe kānûnnâmesi olan dört kıt‘a tarlanın içinde eşcâr-ı müsmiresiyle hakk-ı tasarruflarını vesâyet-i mahkiyem hasebiyle merhûm-ı mezbûrun zarûret-i deyni ve sagīrân-ı merkūmânın zarûret-i nafakası için mezbûr Sefer’e tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan üç bin nakd-i fıddî-i Osmânî râyic fi’l-vakt akçeyi mezbûr Sefer yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân içinde eşcâr-ı müsmire ve gayr-ı müsmire ile dört kıt‘a tarlanın hakk-ı tasarrufu mersûm Sefer’indir sâir emsâli tasarrufu gibi mutasarrıf olsun dedikde mukırra-i mezbûrenin bi’l-vesâye cârî olan ikrâr ve takrîrin el-mukarru lehü’l-mezbûr Sefer bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Ali Bey b. Abdullah, Hüsam Efendi b. Abdullah, Hüseyin b. Abdullah er-Râcil, Hasan b. Rıdvan, Mehmed b. Şaban, Muzaffer b. Rıdvan, Ali b. Abdullah, Veli b. Murad, Mustafa b. Mehmed, Süleyman b. Turgud, Yakub b. Kurd ve gayruhüm mine’l-hâzırîn.