Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 115 Hüküm no: 82 Orijinal metin no: [13a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. İstemad’ın menzil ve bağını Yani v. Anastas’a satıp tarlalarının da kullanım hakkını devretmesi Vilâyet-i Rumeli’nde Mora sancağına Mizistre kazâsına tâbi‘ Küçük Anastas nâm karyeden Kosta v. İstemad nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Anastas nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ tarafeyni Aleksandri v. Toma mülküne ve bir tarafı Dimitri v. Polihroni mülküne ve bir tarafı tarîk-i âma müntehî olup bir tahtânî beyti ve ahırı ve sofayı müştemil mülk menzilimi ve yine karye-i mezbûre bağları dâhilinde Karşika demekle ma‘rûf mevzi‘de vâki‘ inde’l-ahâlî ve’l-cîrân ma‘lûmü’l-hudûd ve’l-mikdâr tahmînen beş çapalık bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Yani’ye iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde tahmînen dört keyl tohum istî‘âb eder iki kıt‘a mutasarrıf olduğum tarlaların hakk-ı tasarruflarını sâhib-i arz ma‘rifetleriyle merkūm Yani’ye tefvîz edip ol dahi minvâl-i mübeyyen üzre tefevvüz ve kabûl kıldıkdan sonra mukābele-i tefvîzde olan beş yüz nakd-i fıddî-i Osmânî râyic fi’l-vakt akçeyi mezbûr yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ât mezkûr Yani’nin mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları mersûmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir min şehri Rebî‘ilevvel li târihi’l-mezbûr. Şuhûdü’l-hâl: Mehmed b. Abdullah er-Râcil, Mehmed b. Mustafa er-Râcil, Velisari v. Yani, Ozgori v. Nikola, Yorgi v. Matyoz, Lomo v. Hınderlo, Kostanti v. Yani.