Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 115 Hüküm no: 81 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Beşe b. Şucâ’nın tarlasının kullanım hakkını devretmesi Vilâyet-i Rumeli’nde Mora sancağında Trapoliçe kazâsına tâbi‘ Dunpos nâm karyeden Ömer Beşe b. Şuca‘ nâm râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Pavle v. Angeli, Dimo v. Nikola ve Yorgo v. Dimo ve Dimo v. Velisari, Nikola v. Kosta ve Yani v. Kiryako nâm zimmîler muvâcehelerinde bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde Zağra demekle ma‘rûf etrâf-ı erba‘ası cebele müntehî tahmînen iki müd tohum istî‘âb eder bir kıt‘a taht-ı tasarrufumda olan tarlanın hakk-ı tasarrufunu sâhib-i arz ma‘rifetiyle mezbûrûna tefvîz edip ol dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan dört bin nakd-i Osmânî râyic fi’l-vakt akçeyi mezbûrûn yedlerinden ale’l-iştirâki’s-seviy ahz ve kabz eyledim ba‘de’l-yevm sâlifü’l-beyân tarlanın hakk-ı tasarrufu merkūmûnundur keyfe mâ yeşâ ve yahtâr mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehümü’l-mezbûrûn bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir min Rebî‘ilevvel li târihi’l-mezbûr. Şuhûdü’l-hâl: Mustafa Çavuş b. Kurd, Ahmed Çelebi b. Receb ez-Za‘îm, Mehmed Çelebi b. Yusuf ez-Za‘îm, Hüseyin Çavuş b. Hasan, Şaban Çavuş b. ( ), Mehmed Beşe b. Abdullah er-Râcil, İbrahim Beşe b. Abdullah er-Râcil, Ali Çelebi b. Perviz, Kayser Ağa ed-Dizdâr, Rüstem Ağa, Hüseyin Ağa b. Piyâle Ser-bevvâbân-ı dergâh-ı âlî ve gayruhüm mine’l-hâzırîn.