Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 117 Hüküm no: 85 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb b. Mehmed’in menzilini Ferhad’ın oğulları Mahmud ve Mehmed’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesi sükkânından olup cüsse ve sinninin tahammülü ve bülûğuna mu‘terif olan Eyüb b. Mehmed nâm kimesne meclis-i şer‘-i hatîr-i lâzımü’t-tevkīrde işbu hâfızay hâze’l-kitâb el-Hâc Mahmud ve Mehmed ibney Ferhad nâm kimesneler mahzarlarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan Osman Çelebi b. Mehmed mülküne ve bir tarafdan Hâce Sinan mülküne ve bir tarafdan tarîk-i hâs ve bir tarafdan tarîk-i âma müntehî iki fevkānî beyti ve ahırı ve zât-ı eşcâr-ı müsmire ve gayr-ı müsmireyi hâvî cüneyneyi ve bir su kuyusu ve bir mikdâr arz-ı hâliyeyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûrâna ale’l-iştirâki’s-seviy otuz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip zikr olunan meblağ-ı mezbûr otuz bin akçenin on beş bin akçe[sini] mezbûr Mahmud ve on beş bin akçesini dahi merkūm Mehmed yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd mezbûrân Mahmud ve Mehmed’in mülk-i müşterâ-yı sarîhleridir keyfe mâ yeşâ ve hasbe mâ yürîd mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehümü’l-mezbûrân Mahmud ve Mehmed her biri bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Rebî‘ilevvel li târihi’l-mezbûr. Şuhûdü’l-hâl: Hasan b. Abdullah el-Bevvâbü’s-sultânî, Mustafa Halîfe b. Muzaffer, Maden Efendi b. Bünyad el-İmâm, Mehmed Bey b. Abdullah er-Râcil, İlyas b. Abdullah, Hasan Efendi b. İbrahim, Hasan b. Abdullah er-Râcil, Mustafa b. Mehmed, Mehmed b. Hanefi ve gayruhüm mine’l-hâzırîn.