Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 119 Hüküm no: 87 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe’nin Yusuf b. Ali’de alacaklı olması Oldur ki medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Kasım Çavuş mahallesi sâkinlerinden İbrahim Beşe er-Râcil meclis-i şer‘de Yusuf b. Ali nâm kimesne üzerine takrîr-i da‘vâ edip bundan akdem merkūm Yusuf’a ve gāibân ani’l-meclis Mustafa b. Mustafa ve İsa b. Abdülganî nâm kimesnelere ber vech-i iştirâk her re’si yüz ellişer akçeye olmak üzre altmış beş re’s koyun verip cümlenin semeni olan dokuz bin yedi yüz elli akçenin bir def‘a beş bin üç yüz ve bir def‘a bin sekiz yüz kırk cem‘an yedi bin yüz kırk akçesin yedlerinden ahz ve kabz edip iki bin altı yüz doksan akçe hakkım bâkī kalmışdır mezbûr Yusuf merkūmân Mustafa ve İsa ile şerîkler olduğu cihetden meblağ-ı bâkī iki bin altı yüz doksan akçe mezbûr Yusuf’dan taleb ederim suâl olunup ihkāk-ı hak olunması matlûbumdur dedikde gıbbe’s-suâl mezbûr Yusuf ikrârıyla cevâb vermeğin meblağ-ı bâkī iki bin altı yüz doksan akçenin edâsına tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis min Rebî‘ilevvel sene 1029. Şuhûdü’l-hâl: İbrahim b. Mustafa, Perviz b. Abdullah, Hasan b. Hüseyin, İbrahim b. Memi.