Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 119 Hüküm no: 88 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Aydın’ın menzilini Sâliha bt. Mehmed’e satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Davud Ağa mahallesinde sâkine Belkıs Hâtun bt. Aydın meclis-i şer‘-i şerîfde hâfız[atü] hâze’l-kitâb Sâliha bt. Mehmed nâm hâtun tarafından husûs-ı âti’z-zikre vekîl olup hasm-ı câhid mahzarında Ahmed Efendi b. Mehmed el-Müderris ve Muharrem b. el-Hâc Ömer şehâdetleriyle vekâleti sâbite olan Maden Efendi b. Bünyad mahzarında takrîr-i kelâm edip mahalle-i mezbûrede vâki‘ bir tarafı İbrahim b. ( ) vakfı ve bir tarafı Emine bt. İskender mülkü ve iki tarafı tarîk-i âm ile mahdûd bir tahtânî beyti ve sofayı ve eşcâr-ı müsmire ve gayr-ı müsmireyi müştemil cüneyneyi hâvî mülk menzilimi cemî‘ tevâbi‘ ve levâhıkı ile mezbûre Sâliha Hâtun’a beş bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve kabûl ve kabz ettikden sonra semen-i mezbûru bi’t-tamâm müşterî-i mezbûre yedinden ahz ve kabz ettim ba‘de’l-yevm menzil-i mezbûr merkūme Sâliha’nın mülk-i müşterâsıdır dedikde mukırra-i mezbûreyi ikrâr-ı meşrûhunda vekîl-i mezbûr vicâhen tasdîk edicek mâ vaka‘a gıbbe’t-taleb ketb olunup yed-i tâlibe def‘ olundu. Hurrire fi’l-yevmi’l-hâdî aşer min Rebî‘ilevvel li sene tis‘a ve ışrîn ve elf. Şuhûdü’l-hâl: Ali Dede b. Mansur, el-Hâc Davud b. Mehmed el-Müezzin, Hızır b. İbrahim, Hasan Efendi b. İbrahim, Muharrem b. el-Hâc Ömer, Mehmed Çelebi b. Muharrem, Oruc b. ( ) Tüfenkçi, Osman b. İbrahim ve gayruhüm.