Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 121 Hüküm no: 90 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin bazı emlâkini Kefriküçük voyvodası Nikola’ya satması Vilâyet-i Rumeli’nde İnebahtı sancağında Yeni Badracık kazâsına tâbi‘ Jomyali nâm karye sâkinlerinden Yorgi v. Yani nâm zimmî meclis-i şer‘-i hatîr-i lâzımü’t-tevkīrde yine Kefriküçük’de voyvodası olan işbu bâ‘isü’l-kitâb Nikola nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Apostol v. Kalıçman mülküne ve bir tarafdan Yani v. İstiko mülküne ve bir tarafdan Rizo v. Pini mülküne ve bir tarafdan Hristo v. Apostol mülküne ve bir tarafdan tarîk-i âma müntehî bir fevkānî ve bir tahtânî beyti ve bir mikdâr bostan yerini ve zât-ı eşcâr-ı müsmire ve gayr-ı müsmireyi hâvî muhavvatayı müştemil mülk menzilimi ve yine karye-i merkūme kurbunda vâki‘ lede’l-ahâlî ma‘lûmü’l-hudûd tahmînen on ırgadlık iki kıt‘a mülk bağlarımı cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Nikola’ya beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ât mezkûr Nikola’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre ikrâr ve takrîrin el-mukarru lehü’l-mezbûr Nikola bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Yakub b. Kurd, Süleyman b. Turgud, Lamyo v. Dimo, Pavli v. Preşkova, Yorgi v. Dimo, Hristo v. Yorgi, Yani v. İstiko, Şiro v. İstiko, Dimo v. Manoleksi, Pavlo v. Mihal ve gayruhüm mine’l-hâzırîn.