Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 120 Hüküm no: 89 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Ali’nin çiftlik, tarlalar ve çayırını Fâtıma bt. Hüdaverdi’ye satması Dârü’s-saltanati’s-seniyye Kostantıniyye el-mahmiyye mahallâtından merhûm Müftü Ali Çelebi mahallesi sâkinelerinden fahrü’l-muhadderât zahrü’l-muvakkarât Rahime bt. Ali nâm hâtun tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında merkūme Rahime’yi ma‘rifet-i şer‘iyye ile ârifân olan Halil Efendi b. Mehmed ve Ahmed Bey b. Mehmed el-Bevvâbü’s-sultânî şehâdetleri ile şer‘an sâbite ve mütehakkika olan Defter-i hâkānî küttâbından olup hâlâ merkūme Rahime’nin zevci olan fahrü erbâbi’t-tahrîr ve’l-kalem zahrü ashâbi’t-takrîr ve’r-rakam Mehmed Bey b. Hızır meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Fâtıma Hâtun bt. Hüdaverdi tarafından husûs-ı âti’l-beyânı tasdîka vekîl olup vekâleti bimâ hüve nehci’l-mu‘teberi’l-mer‘î sâbite olan zevci Yusuf Bey b. Abdullah nâm kimesne mahzarında bi’l-vekâle ikrâr ve takrîr-i kelâm edip Havâss-ı Sultâniyye kazâsı müzâfâtından Çatalca nâhiyesine tâbi‘ Baba Nakkāş demekle ma‘rûf karyede vâki‘ çiftlik demekle mu‘abber bir tarafdan Acem Mehmed Beşe b. ( ) mülküne ve üç tarafdan tarîk-i âma müntehî ve muhavvataynı müştemil muhavvata-i dâhiliyyesi üç tahtânî beyti ve bir anbarı ve fırını ve bir bi’r-i mâyı ve zât-ı eşcâr-ı müsmire ve gayr-ı müsmireyi hâvî cüneyneyi ve kenîfi müştemil olup ve muhavvata-i hâriciyyesi bir büyük ahırı ve tahmînen iki dönüm mikdârı arz-ı hâliyeyi müştemil olan mülk menzilini müvekkile-i merkūme Rahime Hâtun bundan akdem müvekkile-i merkūme Fâtıma’ya yetmiş bin nakd-i fıddî-i Osmânî râyic fi’l-vakt akçeye bey‘-i bât tarîki üzre akd-i bey‘ edip teslîm-i mebî‘ eylediğinden sonra yine karye-i merkūme kurbunda mevâzi‘-i adîdede vâki‘ her biri inde ahâliyi’d-diyâr ma‘lûmü’l-hudûd ve’l-mikdâr tahmînen cümlesi yüz seksen keyl tohum istî‘âb eder dokuz kıt‘a mutasarrıfe olduğum tarlaların ve yine karye-i merkūme sınırında vâki‘ lede’l-ahâlî ve’l-cîrân bir kıt‘a mutasarrıfe olduğum çayırın dahi hakk-ı tasarruflarını sâhib-i arz ma‘rifetiyle müvekkile-i merkūme Fâtıma Hâtun’a on bin nakd-i mezbûrü’n-na‘t akçeye tefvîz edip ol dahi minvâl-i muharrer üzre tefevvüz ve kabûl eyleyip altı bin akçesini hayyiz-i akidde müvekkile-i mezbûre Fâtıma yedinden alıp sâlifü’z-zikr çiftlikden ve bedel-i tefvîzden müvekkile-i mezbûre Fâtıma zimmetinde altmış dört bin nakd-i fıddî-i Osmânî râyic fi’l-vakt akçe bâkī kalmışdı hâlâ meblağ-ı bâkī olan altmış dört bin akçeyi dahi müvekkile-i mersûme Fâtıma yedinden bi’t-tamâm ve’l-kemâl ahz ve kabz eyledi ba‘de’l-yevm sâlifü’l-beyân çiftlik müvekkile-i mezbûre Fâtıma’nın mülk-i müşterâ-yı sarîhidir ve mârrü’z-zikr mevâzi‘-i müteferrikada vâki‘ dokuz kıt‘a mutasarrıfe olduğu tarlaların ve bir kıt‘a çayırın dahi hakk-ı tasarrufları müvekkile-i merkūme Fâtıma’nındır, sâir emsâli tasarrufları gibi keyfe mâ yeşâ ve hasbe mâ yürîd mutasarrıfe olsun dedikde vekîl-i mezbûr Mehmed Bey’in vech-i mübeyyen üzre cârî olan ikrâr ve takrîrin el-mukarru lehü’l-mezbûr Yusuf Bey bi’l-vekâle tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-âşir min Rebî‘ilevvel li târihi’l-mezbûr. Şuhûdü’l-hâl: Umdetü’l-ulemâ’i’l-izâm Ahmed Efendi eş-şehîr bi Şeyhzâde, Receb Halîfe b. Musa el-İmâm, Mehmed Bey b. Mustafa el-Cündî Ahmed Çavuş b. Mustafa, Ali Ağa b. Abdullah, Mustafa b. Mehmed, Abdi Ağa b. Abdullah an zümre-i çavuşân-ı Dergâh-ı âlî, Mehmed b. Hanefi, Ali b. Abdullah, Süleyman b. Turgud, Perviz b. Abdullah.