Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 124 Hüküm no: 95 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Hüseyin ve İsmail b. Hasan’ın Sevindik b. Hacı’ya bazı emlâkini satıp bazılarının da kullanım hakkını devretmeleri Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesi sükkânından Cafer b. Hüseyin ve İsmail b. Hasan nâm kimesneler meclis-i şer‘-i hatîr-i lâzımü’t-tevkīrde işbu hâmilü’l-kitâb Sevindik b. Hacı mahzarında bi’t-tav‘ ve’r-rızâ ikrâr ve takrîr-i kelâm edip vilâyet-i Anadolu’da Arapkir sancağında Eğin kazâsına tâbi‘ Haplos nâm karyede vâki‘ bir tarafdan Veli b. ( ) mülküne ve bir tarafdan Nazar b. Haydar mülküne ve bir tarafdan Musa b. Hamîd mülküne ve iki tarafdan tarîk-i âma müntehî üç tahtânî beyti müştemil mülk menzilimi ve yine karye-i merkūme kurbunda vâki‘ lede’l-ahâlî ma‘lûmü’l-hudûd tahmînen üç ırgadlık bir kıt‘a mülk bağımızı ve Ulupınar demekle ma‘rûf mevzi‘de dahi olan bir dip ceviz ağacı bey‘de dâhildir cümle-i tevâbi‘ ve levâhıkı ve kâffe-i menâfi‘ ve merâfıkları ile bi safkatin vâhidetin mezbûr Sevindik’e dört yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i merkūme sınırında vâki‘ lede’l-ahâlî ma‘lûmü’l-hudûd ale’l-iştirâki’s-seviy mutasarrıf olduğumuz iki kıt‘a tahmînen diyârımız âdeti ile mu‘abber iki çeryek [çeyrek] tohum istî‘âb eder tarlaların dahi hakk-ı tasarruflarını sâhib-i arz ma‘rifetiyle mezbûra tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde mezbûr Sevindik yedinden bin iki yüz nakd-i mezbûrü’n-na‘t akçeyi bi’t-tamâm ve’l-kemâl ahz ve kabz ettik ba‘de’l-yevm sâlifü’l-beyân mebî‘ât mezbûr Sevindik’in mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu mersûmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırrân-ı mezbûrânın vech-i mübeyyen üzre cârî olan ikrâr ve takrîrin el-mukarru lehü’l-mezbûr Sevindik bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fi’t-târihi’l-mezbûr. Şuhûdü’l-hâl: Oruc Dede b. ( ), Saruhan b. Hasan, Hasan b. Yağmur, Hacı b. Zülfikār, Ahmed b. Yar Ahmed, Kaygusuz b. Ali, İskender Beşe, Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd.