Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 125 Hüküm no: 96 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Lagari tekyesine ait mutfak malzemelerinin Ali b. Mustafa’ya kiralanması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Şah Sultan mahallesi kurbunda merhûm Mehmed Lağarî binâ eylediği tekyeye ber vech-i meşrûtiyyet zâviye-nişîn olan Sabiha bt. Ali nâm sagīrenin vâlidesi ve kıbel-i şer‘den mansûbe vasiyy-i şer‘îsi olan Kerime bt. Ali nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ali b. Mustafa nâm kimesne mahzarında bi’l-vesâye ikrâr ve takrîr-i kelâm edip sagīre-i mezbûrenin ber vech-i meşrûtiyyet mutasarrıfe olduğu sâlifü’z-zikr tekyenin beynimizde kadri ve cinsi ilm-i şer‘îyle ma‘lûm evânîsini mezbûr Ali’ye vesâyet-i mahkiyem hasebiyle târih-i kitâbdan beher sene bin üç yüz akçe vermek üzre îcâr edip ol dahi minvâl-i muharrer üzre istîcâr ve kabûl eyledi dedikde mukırra-i mezbûrenin bi’l-vesâye cârî olan ikrâr ve takrîrin el-mukarru lehü’l-mezbûr Ali bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Rebî‘ilevvel sene 1029. Şuhûdü’l-hâl: Hasan Efendi b. İbrahim, Mehmed b. Hasan, Mehmed b. Mustafa, Yakub b. Kurd, Süleyman b. Turgud, Ali b. Abdullah, Perviz b. Abdullah, Mehmed b. Hanefi.