Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 133 Hüküm no: 108 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sekodeş v. Timo’nun bağını Yorgo v. Dimo’ya satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Poskalavo nâm karye sâkinlerinden Sekodeş v. Timo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yorgo v. Dimo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ İstefan demekle ma‘rûf mevzi‘de bir tarafdan Yani v. Peştekü mülküne ve iki tarafdan Yani v. Dimo mülküne ve bir tarafdan cebele müntehî tahmînen iki dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Yorgo’ya iki bin nakd-i fıddî-i Osmânî râyic fi’l-vakt akçeye bey‘ ve kabz-ı semen-i ma‘dûd edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ mezbûrun mülk-i müşterâ-yı sarîhidir keyfe mâ yeşâ ve yahtâr sâir emlâki tasarrufları gibi mutasarrıf olsun dedikde mukırr-ı mezbûrun vech-i muharrer üzre cârî olan ikrâr ve takrîrin el-mukarru lehü’l-mezbûr Yorgo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Rebî‘ilevvel li sene tis‘a ve ışrîn ve elf. Şuhûdü’l-hâl: Yani v. Dimo, Yorgido v. Harido, Dimo v. Andriye, İskarlet v. Dimo, Vasil v. Rizo, Lambo v. (…), İsteryo v. Yovareş ve gayruhüm mine’l-hâzırîn.