Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 135 Hüküm no: 110 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. İlyas’ın bir adet su kuyusu ile debbağ dükkânını Nikola v. Dimitri’ye satması Mahmiye-i Kostantıniyye -humiyet ani’l-âfât ve’l-beliyye- mahallâtından Çelebioğlu mahallesi demekle ma‘rûf mahalle sâkinlerinden olup Selânik cemâ‘ati’nden İlya v. İlyas nâm yahudi meclis-i şer‘-i hatîrde işbu hâmil-i hâze’l-kitâb Nikola v. Dimitri nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı müzâfâtından nefs-i kasaba-i Silivri’de vâki‘ bir tarafdan İsmail Efendi mülküne ve bir tarafdan Yani Debbâğ mülküne ve bir tarafdan dereye ve bir tarafdan tarîk-i âma müntehî bir bi’r-i mâyı ve kiremidden mebnî ocağı müştemil bir bâb mülk debbâğ dükkânımı ve beynimizde kadri ve cinsi ilm-i şer‘î ile ma‘lûm âlât-ı debbâğı ve eşyâ-i sınâ‘ati cümle-i tevâbi‘ ve levâhıkı ile bi safkatin vâhidetin mezbûr Nikola’ya on iki bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân bir bâb dükkân-ı mezbûrun mülk-i müşterâ-yı sarîhidir sâir emlâki tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i muharrer üzre cârî olan ikrâr ve takrîrin el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis aşer min Rebî‘ilevvel li târihi’l-mezbûr. Şuhûdü’l-hâl: Salamon v. Rafayel, Yakob v. Mosi, Yakub b. Kurd, Süleyman b. Turgud, Ali b. Abdullah, Mehmed b. Hanefi, Perviz b. Abdullah, Mustafa b. Mehmed ve gayruhüm mine’l-hâzırîn.