Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 136 Hüküm no: 111 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Basu v. Yagob’un üzüm bağını Papa Tologo’nun oğulları Mitro ve Todori’ye satması (bey‘ bi’l-vefâ) Yahudiyândan olup Aragon cemâ‘ati’nden olan Basu v. Yagob nâm yahudi meclis-i şer‘-i hatîr-i lâzımü’t-tevkīrde işbu râfi‘ayü hâze’l-kitâb Mitro ve Todori veledey Papa Tologo nâm zimmîler muvâcehelerinde bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı müzâfâtından Büyükçekmece’ye tâbi‘ Yaloz nâm karyede vâki‘ bir tarafdan kapıcı Mustafa Çelebi tarlasına ve bir tarafdan İstemad v. Yuvan bağına ve bir tarafdan Tavukçu tarîki demekle ma‘rûf tarîk ve bir tarafdan Kosta v. Lika bağına müntehî olup tahmînen on beş dönüm bir kıt‘a mülk bağımı cümle-i tevâbi‘ ve levâhıkı ile mezbûrâna ale’l-iştirâki’s-seviy târih-i kitâbdan iki buçuk sene tamâmına değin bağları mahsûlünden bana beynimizde ma‘lûm beher sene sekiz fıçı üzüm verip zikr olunan üzüm fıçılarını kendi akçeleri ile kasaba-i Silivri’ye getirmek üzre yirmi fıçı üzüm vermek şartıyla bey‘ bi’l-vefâ tarîkiyle bey‘ edip anlar dahi zikr olunan şurût ve kuyûdu edâ ve îfâ etmeğe her biri ta‘ahhüd ve kabûl eylediler, müddet-i merkūme tamâmından sonra bey‘-i mezbûr bâtte münkalib olsun dedikden sonra mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Ali b. Abdullah, Süleyman b. Turgud, Yakub b. Kurd, Mehmed b. Ahmed.