Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 141 Hüküm no: 119 Orijinal metin no: [19b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahrünnisâ Hâtun bt. Abdülkâdir Efendi’nin evini Seyyid Abdülkâdir Vakfı’na istiğlâl yoluyla sattığı Fahrü’l-muhadderât Fahrünnisâ Hâtun bt. merhûm Abdülkādir Efendi meclis-i şer‘-i şerîfde hâzıre olup âtiyyü’z-zikr menzilini merhûm Seyyid Abdülkādir vakfı’na mütevellî olan hâmil-i hâze’l-kitâb Hasan Halîfe b. İbrahim’e bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için mezbûre Fahrünnisâ Hâtun’un işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu medîne-i Ebâ Eyyûb el-Ensârî’de -radiye anhu Rabbühü’l-Bârî- vâki‘ Zal Paşa câmi‘i kurbundaki Bey Mescidi mahallesinde kâin olup bir tarafdan Ayşe Hâtun bt. Mehmed mülkü, diğer tarafdan Hacer Hâtun bt. ( ) mülkü ve iki tarafdan da tarîk-i âm ile mahdûd menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt yedi bin iki yüz akçe-i Osmânî semen-i mu‘ayyen-i makbûz ile andan iştirâ etti. Mezbûre Fahrünnisâ Hâtun’un menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, zeyilde mezkûr senenin Muharrem-i harâmından bir sene tamâmına yedi yüz yirmi akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mukırra-i mezbûrenin zevci Mehmed Efendi b. merhûm Şeyh Süleyman ve mevlânâ İbrahim Çelebi b. Mehmed Efendi menzil-i mezbûrun derkine ve asl-ı meblağ-ı mezbûra ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sânî ve’l-ışrîn min Rebî‘ilevvel li târihi’l-mezbûr. Şuhûdü’l-hâl: Fahrü’l-akrân Mahmud Çelebi en-Nâzır, Mahmud Çelebi b. Hasan, Mahmud b. Abdullah, Mustafa b. Abdullah, İsmail Çelebi b. Mehmed Efendi, Abdülkādir Çelebi b. mevlânâ Mehmed Efendi, Ali Cafer b. merhûm Süleyman, Mustafa b. Mehmed, Süleyman b. Turgud