Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 141 Hüküm no: 118 Orijinal metin no: [19b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. (…) v. Manol’ün evini Yakub Ağa Vakfı’na istiğlâl yoluyla sattığı Havâss-ı Aliyye tevâbi‘inden Karakali karyesinden (…) v. Manol nâm zimmî meclis-i şer‘-i şerîf ve mahfil-i dîn-i münîfde hâzır olup âtiyyü’z-zikr menzilini merhûm Yakub Ağa vakfı’na mütevellî olan hâmil-i hâze’l-kitâb Hasan b. Abdullah nâm kimesneye bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl için zimmî-yi mezbûrun işbu akdin sudûruna kadar sâhibi ve mâliki olduğu elinde ve taht-ı tasarrufunda bulundurduğu karye-i mezbûrede kâin olup bir tarafdan Denito v. Dimitri mülkü, diğer tarafdan Andriye v. Nikola mülkü, öbür tarafdan İstemad v. Yani mülkü ve diğer tarafdan da vâdi ile mahdûd olan menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt iki bin iki yüz akçe-i Osmânî semen-i mu‘ayyen-i makbûz ile andan iştirâ etti. Zimmî-yi mezbûrun menzil-i merkūmu kirâlamak istemesi üzerine müşterî-yi mezbûr ba‘de’t-tahliyye ve’t-tekābuz, 928 senesi gurre-i Ramazân-ı mübârekinden bir sene tamâmına iki yüz seksen akçe ücret-i kirâ mukābilinde menzil-i merkūmu icâreye verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra İstemad v. Yani ve Dimitri v. İstemad nâm zimmîler menzil-i mezbûrun derkine ve asl-ı meblağ-ı mezbûra ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-ışrîn min Rebî‘ilevvel li târihi’l-mezbûr. Şuhûdü’l-hâl: Davud b. Yunus, Abdülhalim Halîfe, İlyas b. Hasan, Süleyman el-Müezzin, Ramazan b. Abdullah, Osman el-Müezzin ve gayruhüm mine’l-hâzırîn.