Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 143 Hüküm no: 121 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Mustafa’nın menzili ile bahçesini Fâtıma bt. Abdullah’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Ahmed Dede mahallesi sükkânından İbrahim Beşe b. Mustafa nâm râcil meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Fâtıma bt. Abdullah nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan İbrahim Çelebi b. Mehmed mülküne ve bir tarafdan yine benim mülküme ve bir tarafdan tarîk-i hâssa ve bir tarafdan tarîk-i âma müntehî iki fevkānî beyti ve bir ahırı ve sofayı ve şehnişîni müştemil mülk menzilimi ve silk-i mülk-i sahîhimde münselik ve münharıt bahçemden zirâ‘-ı kirpas ile tûlen on yedi ve arzen on beş zirâ‘ bahçemi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûre Fâtıma Hâtun’a yirmi bin nakd-i fıddî-i Osmânî râyic fi’l-vakt akçeye bâtten bey‘ edip kabz-ı semen ve teslîm kıldım ba‘de’l-yevm sâlifü’l-beyân menzil-i mahdûd mezbûre Fâtıma’nın mülk-i müşterâ-yı sarîhidir keyfe mâ yeşâ mutasarrıfe olsun dedikde mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mehmed Halîfe b. Mehmed el-İmâm, Mustafa b. ( ) el-Müezzin, Piyâle b. Abdullah, Veli Bey b. Halil, Mehmed b. Hanefi, Mustafa b. Mehmed, Turhan Bey b. Abdullah el-Cündî ve gayruhüm.