Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 143 Hüküm no: 122 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Debbağlara tahsis edilen hayvan derilerinin peremeciler tarafından başka yerleri götürülmemesi Medîne-i Ebâ Eyyûb el-Ensârî -râdiye anhu Rabbühü’l-Bârî-’de debbâğ tâifesinden Osman b. Hüdâverdi ve el-Hâc Mehmed b. Veli ve Mehmed b. Süleyman ve Ali b. Durmuş ve el-Hâc Mustafa b. Mehmed ve diğer Mustafa b. Mehmed nâm kimesneler ve gayrıları cemm-i gafîr ve cem‘-i kesîr meclis-i şer‘-i hatîr-i lâzımü’t-tevkīrde yine medîne-i merkūmede peremeci tâifesinin kethüdâları olan Yusuf Bey b. Maksud nâm kimesneyi ihzâr ve üzerine her biri takrîr-i kelâm edip medîne-i merkūmede bu âna gelince zebh olunan koyun ve kuzu ve sığır ve keçi ve …? derileri mevzi‘-i âhara nakl olunmayıp bahâsı ile biz almak bâbında yedimizde emr-i celîlü’l-kadr var iken hâlâ ba‘zı peremeci tâifesi sâlifü’l-beyân derileri yerlerine tahmîl edip âhar mevzi‘e nakl eyledikleri ecilden kisb ve kârımıza küllî noksân ve zarar müterettib olmuşdur zikr olunan derileri peremeci tâifesi peremelerine tahmîl edip mevzi‘-i âhara nakl etmemeleri için mezbûr Yusuf Bey tâife-i mezkûrenin kethüdâları olduğu hasebden yedimizde olan emr-i celîlü’ş-şân mûcebince neferâtına tenbîh ve te’kîd etmek bâbında merkūm Yusuf Bey’e kıbel-i şer‘den tenbîh olunmak matlûbumuzdur dediklerinde mukırrûn-ı mezbûrunun yedlerinde olan emr-i şerîfe nazar olundukda takrîrlerine muvâfık ve mutâbık bulunmağın mezbûr Yusuf Bey neferâtını mevzi‘-i âhara peremeleri ile deri alıp gitmeden tenbîh olunup cânib-i şer‘-i kavîmden işbu hurûf ber sebîli’t-temessük ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Mehmed b. Hanefi, Hasan b. İbrahim, Hasan b. Mehmed, Mehmed b. Ahmed, Yakub b. Kurd, eş-Şeyh Mehmed b. Murtaza, Ali b. Abdullah, Süleyman b. Turgud, Mehmed b. Hasan, Ahmed b. Mehmed ve gayruhüm mine’l-hâzırîn.