Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 147 Hüküm no: 128 Orijinal metin no: [20b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayrünnisa bt. Seyyid Mehmed’in miras hususunda Pîr Mehmed Efendi ile sulh olması [Derkenar:] Bu hüccet beşinci kâğıdda tekrâr kayd olunmuşdur gayr-ı kāide üzre. Vilâyet-i Anadolu’da nefs-i Taşköprü sâkinelerinden fahrü’l-muhadderât Hayrünnisa bt. es-Seyyid Mehmed tarafından husûs-ı âti’l-beyânı da‘vâ ve talebe ve bey‘ ve şirâya ve sulh ve ibrâya vekîli olup vekâleti hasm-ı şer‘î-i câhid mahzarında mezbûreyi ilm-i şer‘î ile ârifân olan mefharü’l-müderrisîn Ahmed Çelebi b. Mustafa ve Mehmed Efendi b. Abdülkerim şehâdetleri ile şer‘an sâbite ve mütehakkika olan zevci fahrü’l-müderrisîn mevlânâ Mehmed Efendi b. Mehmed mahzarında bi’l-vekâle takrîr-i kelâm edip mezbûr Pîr Mehmed Efendi’nin halîlesi olup bundan akdem müteveffât oldukdan [sonra] verâseti zevc-i metrûkü mezbûr Pîr Mehmed Efendi’ye ve merkūm Pîr Mehmed Efendi’den hâsıl olmuş sadrî evlâdı Mustafa ve Abdülbâkī ve Hayrünnisa nâm sagīrlere münhasıra olan Fâtıma bt. Ali nâm hâtunun terekesinden olmak zu‘muyla mezbûr Pîr Mehmed Efendi asâleten ve velâyeten vâzı‘u’l-yed olduğu medîne-i Ebâ Eyyûb-i Ensârî -râdiye anhu Rabbühü’l-Bârî-’de Zal Mahmud Paşa Câmi‘-i şerîfi kurbunda Bey mahallesinde vâki‘ bir tarafı kâtib Mustafa Çelebi b. ( ) mülküne ve kıdvetü’l-ulemâ Musa Efendi b. Derviş Mehmed mülküne ve ( ) b. Abdullah nâm bevvâb-ı sultânî mülküne ve bir tarafı Abdülbâkī Çelebi b. ( ) nâm müteveffâdan veresesine intikāl eden mülk menzile ve iki tarafı [21a] tarîk-i âma müntehî ve mahdûd olan mülk menzil müvekkile-i mezbûrenin vâlidesinden kendiye irs-i şer‘î ile intikāl etmiş mülk-i mevrûsu olmak üzre sâbıkan medîne-i mezbûrede hâkimü’ş-şer‘ olan a‘lemü’l-ulemâ’i’l-izâm efdalü’l-fuzalâi’l-fihâm Abdullah Efendi b. Ali huzûrunda müvekkile-i mezbûre Hayrünnisa’nın olmak üzre da‘vâ-yı istihkāk ettikde mezbûr Pîr Mehmed Efendi dahi istihkāk-ı mezkûru ikrâr edicek ikrâr-ı mu‘teber-i mukırrın nefsi üzerine hüccet olup gayrı üzerine hüccetden kāsır ve gayr-ı müessir olmağla mezbûr Pîr Mehmed Efendi’nin ikrâr-ı mezkûru kendi hakkında hüccet-i müessir ve sıgār-ı mezkûre haklarında gayr-ı müessir olmağın menzil-i mezkûrdan merkūm Pîr Mehmed Efendi’nin vâris olmak zu‘muyla asâleten vaz‘-ı yed ettiği rub‘-ı şâyi‘i vekîl-i mezbûr Ali Efendi’nin talebi ile hâkim-i müşâ‘ müvekkile-i mezbûre Hayrünnisa’ya hüküm ve teslîme tenbîh edip ve velâyeten vaz‘-ı yed ettiği selâse-i erbâ‘ı müvekkile-i mezbûrenin olduğu şer‘an sâbit olunca sıgār-ı mezkûreler için müvekkile-i mezbûreye merkūm Pîr Mehmed Efendi ikrârıyla menzil-i mezkûrdan hükm olunan rub‘ hisseyi ba‘de’l-kabz mezbûr Pîr Mehmed Efendi’ye dokuz bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldığımdan sonra menzil-i mezkûrdan mevkūfen ale’l-beyân olan selâse-i erbâ‘ı isbât sadedinde iken beynimizde müslimûn-ı muslihûn tavassut edip es-sulhu seyyidü’l-ahkâm fehvâsınca selâse-i erbâ‘ı da‘vâ ve talebden ferâğım mukābelesinde üç bin akçe üzre akd-i sulh inşâ edip bedel-i sulh olan üç bin akçe[yi] merkūm Pîr Mehmed Efendi yedinden bi’t-tamâm ve’l-kemâl ahz ve kabz edip mezbûr Pîr Mehmed Efendi’nin emsâli husûs-ı mezkûru da‘vâ ve talebden ibrâ-i âmla ibrâ ve iskāt-ı tâmla iskāt eyledim ba‘de’l-yevm müvekkile-i mezbûreden husûs-ı mezkûra müte‘allik bi’l-asâle ve’l-vekâle da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmaya dedikde vekîl-i mezbûr Mehmed Efendi’nin bi’l-vekâle cârî olan ikrâr ve takrîrin el-mukarru lehü’l-mezbûr Pîr Mehmed Efendi bi’l-asâle ve’l-velâye tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis ve’l-ışrîn min Rebî‘ilevvel li sene tis‘a ve ışrîn ve elf. Şuhûdü’l-hâl: Fahrü’l-kuzât Celâleddin Efendi, Mustafa Ağa b. Hasan el-Cündî Hüsameddin Efendi b. Ahmed el-Müderris, Hasan Efendi b. İbrahim, Ahmed Bey b. Şaban, Ahmed Çelebi b. İbrahim, Mehmed b. Hasan el-Müezzin, İbrahim Çelebi b. Mustafa, Mustafa Çelebi b. ( ) el-İmâm, Mustafa Çelebi b. ( ) el-Kâtib, Mehmed Çelebi b. Hasan, Vâlihîzâde Mustafa Efendi, Ahmed Efendi b. ( ) el-Kadı, İsmail Efendi el-Kadı, Mehmed Çelebi b. İbrahim, Muharrirü’l-hurûf es-Seyyid Şeyh Mehmed Efendi b. el-merhûm Hüsameddin el-Müsta‘id ve gayruhüm.