Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 146 Hüküm no: 127 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Behram b. Abdullah’ın vakf ettiği menzilde Mustafa b. Veli’nin oturması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesi kurbunda vâki‘ merhûm Behram b. Abdullah nâm kimesnenin vakıf ve tesbîl eyleyip süknâsını sulehâya şart eylediği vakıf menzilde sâkin olup tarîk-i hacda fevt olan Abdi nâm kimesnenin yeri mahlûl olmağla yerine işbu hâfız-ı hâze’l-kitâb mefharü’s-sulehâ el-Hâc Mustafa b. Veli nâm kimesne sâlih ve mütedeyyin ve süknâya küllî ihtiyâcı mütebeyyin olup her vechile mahal ve müstahık olduğunu a‘lemü’l-ulemâ’i’l-izâm efdalü’l-fuzalâi’l-kirâm alemü’l-ilm ve’l-hüdâ menârü’l-fazl ve’t-tukā izzetlü Hâce Efendi hazretleri i‘lâm eyledikleri ecilden menzil-i mezbûr merhûm el-Hâc Mustafa’ya tevcîh olunup işbu hurûf ber sebîli’t-temessük ketb ve imlâ ve tahrîr [ve] inşâ olunup yed-i tâlibe def‘ ve vaz‘ olundu lede’l-ihtiyâc ibrâz ve ihticâc edine. Hurrire fi’l-yevmi’s-sâbi‘ min Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Fahrü’l-eimme Ömer Efendi b. Abdülkādir, Abdullah Efendi b. Abdülkādir el-Müezzi[n], Receb Halîfe b. Ömer el-İmâm, Mustafa Efendi b. Muzaffer el-İmâm, Ali Bey b. Abdullah, Abdurrahman Efendi b. Abdullah, Abdülganî b. Durak, Mehmed Bey b. Hasan el-Cündî Ali b. Abdullah, Süleyman b. Turgud, Yakub b. Kurd, Mustafa b. Mehmed, Ahmed b. Hasan, Keyvan Bey b. Abdullah ve gayruhüm mine’l-hâzırîn.