Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 149 Hüküm no: 130 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayezid b. Üveys’in vefâtından önce Abdurrahman’a para emânet etmiş olduğu Medîne-i Ebâ Eyyûb-i Ensârî -râdiye anhu Rabbühü’l-Bârî-’de bi’l-fi‘l merhûm-ı müşârün-ileyh hazretlerinin evkāf-ı şerîfelerine mütevellî olup medîne-i merkūmede vâki‘ olan mevtânın beytülmâl emîni olan fahrü’l-emâcid ve’l-ekârim zübdetü’l-mefâhir ve’l-mekârim Ahmed Ağa b. Musa nâm kimesne tarafından husûs-ı âti’l-beyânı da‘vâya vekîl olup vekâleti bimâ hüve nehci’s-sübût sâbite olan İlyas Çelebi b. Yakub nâm kimesne meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Abdurrahman b. ( ) nâm kimesneyi ihzâr ve mahzarında takrîr-i da‘vâ edip bundan akdem medîne-i merkūme mahallâtından Servi mahallesinde merkūm Abdurrahman ile bir odada sâkin iken vefât eden Bayezid b. Üveys nâm kimesne fevt olmazdan bir ay mukaddem merkūm Abdurrahman’a sen hıfz ve hırâset eyle deyû on bin nakd-i fıddî-i Osmânî râyic fi’l-vakt akçe alâ tarîki’l-vedî‘a vaz‘ edip fevt oldukda zâhirde vâris-i ma‘rûfu olmamağla terekesi cânib-i vakf-ı mezbûra âid ve râci‘ olmağın meblağ-ı mersûm cânib-i vakf-ı mezbûr için merkūm Abdurrahman’ın yedinden tahlîs olunmak matlûbumdur dedikde gıbbe’s-suâl merkūm Abdurrahman cevâbında fi’l-hakīka müteveffâ-yı mezbûrun benim zimmetimde alâ tarîki’l-vedî‘a on bin nakd-i mezbûrü’n-na‘t akçesi olduğu vâki‘dir ve lâkin yüz yetmiş akçeye yirmi sekiz aded filori ve beşer akçeye dört yüz on aded şâhî ve yüz onar akçeye beş aded guruş ve yüz akçeye bir guruş mâ‘adâsı hurda akçedir bu hesâb üzre müteveffâ-yı mezbûrun on bin nakd-i fıddî-i Osmânî râyic fi’l-vakt akçesi zimmetimde vardır deyû meclis-i şer‘de bi tav‘ihî ikrâr ve i‘tirâf ettikden sonra mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ min Rebî‘ilâhir li târihi’l-mezbûr. Şuhûdü’l-hâl: Mustafa b. Mehmed, Mustafa Çelebi b. Ali Çukadâr, Ali b. Abdullah, Yakub b. Kurd, Ahmed b. Mehmed, Süleyman b. Turgud, Hüseyin b. Yusuf, (…) b. Abdullah, Ali b. Hasan.