Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 150 Hüküm no: 131 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. İstemo’nun menzil ve bağını İstemo v. Yani’ye satması Vilâyet-i Rumeli’nde Yanya kazâsına tâbi‘ İlmine nâm karyeden Yani v. İstemo nâm zimmî meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb İstemo v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ iki tarafdan tarîk-i âma ve bir tarafdan Niko v. İstemo mülküne ve bir tarafdan diğer Niko v. Yani mülküne müntehî iki tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi ve menzil-i mezbûra muttasıl ve mülâsık tahmînen bir dönüm bir kıt‘a mülk bağımı cümle-i tevâbi‘ ve levâhıkı ile mesfûr İstemo’ya bi safkatin vâhidetin bin dört yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil ve bağ mezbûr İstemo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dediklerinde mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa [b.] Mehmed, Ali b. Abdullah, Yakub [b.] Kurd, Süleyman b. Turgud, Dimo v. Minho, Anaso [v.] Parsık, Kiryaki [v.] Yani, Hristo [v.] İstemo, Niko v. Videte, Minho v. Dimo ve gayruhüm mine’l-hâzırîn.