Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 172 Hüküm no: 134 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müşerref bt. Abdullah’ın mirasının kocasına verilmesini vasiyet ettiği Vasiyyet Mahmiye-i İstanbul’da Akşemseddin mahallesi sâkinelerinden Müşerref bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hüseyin b. Halil ve Hasan b. Mehmed nâm kimesneler şehâdetleri ile şer‘an sâbit olup mahalle-i mezbûrede Yavaşça mescidinde imâm olan Şaban Efendi b. eş-Şeyh Ahmed Efendi meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müvekkile-i mezbûrenin zevci bâ‘isü’l-kitâb Dilâver b. Abdullah nâm kimesne tarafından husûs-ı âti’l-beyâna vekîl olup vekâleti şâhidân-ı mezbûrân şehâdetleri ile şer‘an sâbite olan Mustafa Halîfe b. Emrullah nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Müşerref zevci mezbûr Dilâver’den gayrı vârisi olmamak ile şöyle vasiyyet eyledi ki bi emrillâhi te‘âlâ dâr-ı fenâdan dâr-ı bekāya intikāl ettikde muhallefâtının nısfını zevci mezbûr Dilâver bi tarîki’l-farziye kabz ettiğinden sonra nısf-ı âharını dahi vasiyyet tarîki ile yine zevci mezbûr Dilâver alıp kabz eyleye deyip mezbûr Dilâver dahi vasiyyet-i mezbûreyi kabûl eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min Cumâdelûlâ li sene seb‘a ve seb‘în ve elf. Şuhûdü’l-hâl: Halil Efendi b. Mustafa el-Müezzin, Abdurrahman b. ( ), Hakkâk Ahmed Çelebi b. ( ), İbrahim Halîfe b. ( ), Receb Beşe b. ( ).