Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 172 Hüküm no: 135 Orijinal metin no: [18a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Lino’nun, Dimitri v. Mihal’i hırsızlıkla suçladığı ancak ispat edemediği Yemîn Mahmiye-i İstanbul’da Muhsine Hâtun mahallesinde sâkin Dimo v. Lino nâm zimmî mahfil-i kazâda işbu bâ‘isü’s-sifr Dimitri v. Mihal nâm zimmî muvâcehesinde üzerine da‘vâ ve takrîr-i kelâm edip mezbûr Dimitri târih-i kitâbdan altı sene mukaddem benim iznim yoğiken menzilimden seksen dirhem bir sîm kadehim ve yüz yirmi dirhem bir sîm maşrabam ve on iki zirâ‘ bir top keten bezim ahz u kabz etmişdir suâl olunup alıverilmesi matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin târih-i mezbûrda müdde‘î-i mezbûrun izni yoğiken menzilinden zikr olunan eşyâsını ahz u kabz etmediğine mezbûr Dimitri’ye yemîn teklîf olundukda ol dahi yemîn billâhi’llezî enzele’l-İncîle alâ İsa -aleyhi’s-selâm- etmeğin müdde‘î-i mezbûr bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâmin aşer min Cumâdelûlâ li sene seb‘a ve seb‘în ve elf. Şuhûdü’l-hâl: Ali Çavuş el-Mübâşir, Veli b. Mahmud, Abdi Çelebi b. Hüseyin, Şükrullah Bey b. Mustafa, Mehmed Beşe b. Ramazan, İstati v. Yani, Yani v. Yorgi, Panayot v. Nikola, Manol v. Mihal, Polihroni v. Şiro.