Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 152 Hüküm no: 134 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Göka v. Dimo’nun emlâk ve hayvanlarını Lesbo bt. Yano’ya hibe etmesi Vilâyet-i Rumeli’nde Filibe kazâsı sâkinlerinden Göka v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb yine vilâyet-i merkūmede Ergirikasrı kazâsına tâbi‘ Prakovida nâm karye sâkinelerinden Lesbo bt. Yano nâm nasrâniye tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’l-mer‘î sâbite ve mütehakkika olan merkūme Lesbo’nun li ebeveyn karındaşı Göka v. Pano nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip sâbıkan sâkin olduğum karye-i merkūme Prakovida’da vâki‘ bir tarafdan Kika v. Hakil? ve bir tarafdan Dimo v. Kondi mülküne ve iki tarafdan tarîk-i âma müntehî iki tahtânî beyti müştemil mülk menzilimi ve yirmi re’s mülk-i mahzım ve hakk-ı sırfım olup hâlâ karye-i merkūmede Prakovida’da mevcûd olan koyunumu ve iki kıt‘a lede’l-ahâlî ma‘lûmü’l-hudûd harman yerimi ve iki re’s kara sığır öküzümü ve iki re’s kara sığır ineğini ve beynimizde her biri ilm-i şer‘î birle ma‘lûm esâs-ı beytimi hasbeten lillâhi te‘âlâ müvekkile-i mezbûre Lesbo’ya hibe-i sahîha-i şer‘iyye ile cümlesini hibe ve temlîk eyleyip sâlifü’l-beyân mülk-i mevhûbları mahallinde kabza müvekkile-i merkūme Lesbo’yu taslît eyledim ba‘de’l-yevm sâlifü’l-beyân menzil ve harman yerleri ve gayrıları müvekkile-i merkūme Lesbo’nun mülk-i mevhûblarıdır keyfe mâ yeşâ ve yahtâr mutasarrıfe olsun dedikde mukırr-ı mezbûrun vech-i meşrûh üzre cârî olan ikrâr ve takrîrin vekîl-i mezbûr Göka bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî evâili Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Mustafa [b.] Mehmed, Ali b. Abdullah, Mehmed b. Ahmed, Hasan b. Hüseyin, Perviz b. Abdullah, Kika v. Zoto, Petosi v. Dimo, İlya v. Yani, Yani v. Kara Vano, Vasil v. Göno, Kiro [v.] (...), Deriçe [v.] Nika, Koçi [v.] Kiro ve gayruhüm mine’l-hâzırîn.