Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 153 Hüküm no: 135 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Göka v. Dimo ile Lesbo bt. Pano’nun boşanması Vilâyet-i Rumeli’nde Filibe kazâsı sâkinlerinden Göka v. Dimo nâm zimmî meclis-i şer‘-i hatîr-i lâzımü’t-tevkīrde yine vilâyet-i merkūmede Ergirikasrı kazâsına tâbi‘ Prakovida nâm karye sâkinlerinden işbu hâmiletü hâze’l-kitâb Lesbo bt. Pano nâm nasrâniye tarafından husûs-ı âti’l-beyânı tasdîka vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’ş-şer‘î şer‘an sâbite ve mütehakkika olup merkūme Lesbo’nun li ebeveyn karındaşı olan Göka v. Pano nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip merkūme Lesbo’yı bundan akdem Pano Kahmiz mahzarında talâk-ı selâse ile tatlîk edip ba‘dehû kendiyi murâd eylediği kimesneye tezvîc eylesin deyû haber göndermişdim hâlâ mezbûre Lesbo el-haberu yahtemilu’s-sıdk ve’l-kizb mısdâkınca husûs-ı mezbûru tasdîka karındaşı mezbûr Göka’yı tevkîl-i şer‘î ile tevkîl ile mezbûru talâk-ı selâse ile tatlîk eylediğim mukarrer ve muhakkakdır ba‘de’l-yevm müvekkile-i mezbûre Lesbo kendi nefsini murâd eylediği kimesneye tezvîc eylesin dedikde mukırr-ı mezbûrun vech-i meşrûh üzre cârî olan ikrâr ve takrîri vekîl-i mezbûr Göka bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî selhi Rebî‘ilâhir li seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Süleyman b. Turgud, Yakub b. Kurd, Perviz b. Abdullah, Kika v. Zoto, Petoş v. Dimo, Yani v. Kara Vano, Deriçe v. Nika, Vasil v. Göno, Koço v. Kiro ve gayruhüm mine’l-hâzırîn.