Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 160 Hüküm no: 147 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Kosta’nın borcuna karşılık olarak Mustafa Bey b. Hızır’a emlâk ve hayvanlarını rehin verdiği Cem‘an 25.000 Vilâyet-i Rumeli’nde Vize kazâsına tâbi‘ Misinli nâm karyeden Nikola v. Kosta nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb mahmiye-i Kostantıniyye mahallâtından Altımermer kurbunda Kâtib Muslihiddin mahallesinde sâkin fahrü’l-eşbâh Mustafa Bey b. Hızır nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mezbûr Mustafa Bey’e zimmetimde yirmi iki bin nakd-i fıddî-i Osmânî râyic fi’l-vakt akçe karz-ı şer‘îden ve târih-i kitâbdan yüz yirmi gün tamâmına dek müeccel üç bin akçe çuka bahâsından ki cem‘an yirmi beş bin nakd-i mezbûrü’n-na‘t akçe deynim olup mukābelesinde silk-i mülk-i sahîhimde münselik ve münharıt karye-i merkūmede bir tarafdan Zafitoz v. ( ) mülküne ve bir tarafdan Andriye v. Kini mülküne ve bir tarafdan Apostol v. ( ) mülküne ve bir tarafdan tarîk-i âma müntehî mülk menzilim ve yine karye-i merkūmede Zafito nâm zimmîden iştirâ eylediğim lede’l-ahâlî ma‘lûmü’l-hudûd olan diğer mülk menzilim ve dört çift kara sığır öküzü ve bir çift su sığırı öküzü ve on beş re’s kara sığır ineği ve karye-i merkūme kurbunda inde ahâliyi’d-diyâr her biri ma‘lûmü’l-hudûd ve’l-mikdâr iki kıt‘a mülk bağlarım ve yine karye-i merkūmede vâki‘ lede’l-ahâlî ve’l-cîrân bir kıt‘a mülk harman yerini müştemil bir büyük mülk ahırımı mezbûr Mustafa Bey yedinde rehn-i makbûzdur dedikden sonra mukırr-ı mezbûrun ikrâr ve takrîrin el-mukarru lehü’l-mezbûr Mustafa Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti Rebî‘ilâhir li târihi’l-mezbûr. Şuhûdü’l-hâl: Mehmed Beşe b. Kurd er-Râcil, Ebûbekir Çelebi b. Bayram, Mehmed Ağa b. Mustafa, İskender b. Şaban, Ali b. Abdullah, Nuh Çavuş b. Ebûbekir, İsmail Efendi b. ( ) el-Kadı, Ali Çelebi b. Mehmed er-Râcil, Mehmed b. Ahmed, el-Hâc Mehmed Bey b. Abdullah, Mehmed b. Hasan, Hasan b. Abdullah er-Râcil, Ali b. Abdullah, Ali Çelebi b. Mustafa er-Râcil, Mustafa b. Mehmed, Süleyman b. Turgud. Bâlâda mastûr olan Nikola’nın oğlu Aleksi nâm zimmî meblağ-ı mezbûrun cümlesine emr-i kabûlü hâvî kefâletle kefîl olduğu bi’t-taleb kayd-ı sicil olundu. Hurrire fi’t-târihi’l-mezbûr. Şuhûdü’l-hâl: Es-Sâbıkūn.