Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 178 Hüküm no: 170 Orijinal metin no: [25(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Bayezid’in kızları Şah Sultan ve Fâtıma Sultan’ın boş arsalarının Zeynel b. Kaya’ya satılması [Mahmiye-i Kostantıniyye] -humiyet ani’l-âfât ve’l-beliyye- mahallâtından (...) burcü’l-isme Şah Sultan ve Fâtıma Sultan ibnetey el-merhûm Sultan Bayezid Hân hazretlerinin taraf-ı âliyelerinden husûs-ı âti’l-beyâna vekîl olup hasm-ı câhid mahzarında nehc-i şer‘i’l-mu‘teber üzre müşârün-ileyhimâ sultanların [zâtlarını] ma‘rifet-i şer‘iyye ile ârifeyn olan Mehmed Bey b. Zülfikār ve el-Hâc Mehmed b. Kasım şehâdetleri ile vekâleti sâbite olan fahrü’l-akrân Mehmed Bey b. Hüseyin el-Bevvâbü’s-sultânî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Zeynel b. Kaya nâm kimesne muvâcehesinde vekâleten ikrâr ve takrîr-i kelâm edip müvekkilelerim müşârün-ileyhimânın silk-i mülklerinde olup medîne-i Ebâ Eyyûb-i Ensârî -radiye anhu Rabbühü’l-Bârî-’de vâki‘ Servi mahallesinde vâki‘ bir tarafdan İdris b. Ali mülküne ve bir tarafdan Kamer Hâtun bt. Abdullah mülküne ve bir tarafdan yine müvekkilelerim müşârün-ileyhimânın mülklerine ve bir tarafdan tarîk-i âma müntehî olup bennâ zirâ‘ı ile tûlen yirmi yedi buçuk ve arzen on beş buçuk zirâ‘ mülk arz-ı hâliyelerin vekâlet-i mahkiyem hasebiyle mezbûr Zeynel’e beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm [ve] kabz ettikden sonra semen-i mezbûru müşterî-i merkūm yedinden bi’t-tamâm ahz ve kabz eyledim ba‘de’l-yevm sâlifü’z-zikr arz-ı hâliye merkūm Zeynel’in mülk-i müşterâsıdır keyfe mâ yeşâ mutasarrıf olsun dedikde vekîl-i mezbûrun ikrâr-ı meşrûhun müşterî-i mezbûr vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Abdürrahim Halîfe b. Hızır el-İmâm, Hüseyin b. Sefer el-Müezzin, Mehmed b. Kasım, İdris b. Ali, Mustafa b. Mehmed.