Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 177 Hüküm no: 169 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çavuşbaşı Burunsuz Mustafa Ağa vakfına ait Silivri’deki menzilin Rika v. Pavli’ye satılması Mahmiye-i Kostantıniyye -humiyet ani’l-âfât ve’l-beliyye- mahallâtından ( ) mahallesi sâkinlerinden olup bi’l-fi‘l Çavuşbaşı Burunsuz Mustafa Ağa vakfı’na mütevellî olan mefharü’l-a‘yân Sâlih Bey b. eş-Şeyh Mehmed nâm yesârî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Rika v. Pavli nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip bundan akdem Havâss-ı Aliyye kazâsına tâbi‘ kasaba-i Silivri müzâfâtından Gülveri nâm karye sâkinlerinden olup mürd olan Kosta v. Dimitri nâm zimmî zimmetinde vakf-ı mezbûr malından yirmi bin akçe olup ba‘de helâkihî verâseti sulbî kebîr oğlu Dimitri nâm zimmîye münhasıra olup hâlik-i mezbûrun kasaba-i mezbûre mahallâtından Câmi‘-i Atîk mahallesinde vâki‘ bir tarafdan Ağlava v. Dimitri ve üç tarafı tarîk-i âma müntehî iki fevkānî beyti ve bir ahırı müştemil menzilden gayrı bir şeyi olmamağın mezbûr Dimitri menzil-i mezbûru yirmi bin fıddî-i Osmânî râyic fi’l-vakt akçeye vakıf için bana bey‘ edip ben dahi tevliyyetim hasebiyle iştirâ ve kabz eyledim idi hâlâ menzil-i mezbûru merkūm Rika’ya tevliyyetim hasebiyle yirmi bin nakd-i mezbûrü’n-na‘t akçeye bey‘-i bâtt-ı sahîh-i şer‘î ile bey‘ edip semen-i ma‘dûdu vakf-ı mezbûr için ahz ve kabz ve teslîm-i mebî‘ kıldım ba‘de’l-yevm sâlifü’l-beyân menzil-i mahdûd merkūm [Rika’nın] mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i meşrûh üzre cârî olan ikrâr ve takrîrin el-mukarru lehü’l-merkūm Rika tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis ve’l-ışrîn min Rebî‘ilâhir li sene tis‘a ve ışrîn ba‘de’l-elf. Şuhûdü’l-hâl: Ebûbekir Çelebi [b.] Mehmed el-Müsta‘id, Abdülbâkī Efendi b. Mehmed el-Müsta‘id, Mehmed Çavuş b. Abdullah, el-Hâc Abdürrahim b. Abdullah ve gayruhüm.