Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 179 Hüküm no: 172 Orijinal metin no: [25(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın bazı emlâkini Mano v. Fora’ya satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Mişnikola [Miraşnikola] nâm karye sükkânından Ali Beşe b. Abdullah er-Râcil meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mano v. Fora nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Franko v. Todori mülküne ve bir tarafdan Yorgo v. Preşkova mülküne ve bir tarafdan Panayot v. ( ) mülküne ve bir tarafdan tarîk-i âma müntehî iki beyti ve bir ahırı müştemil mülk menzilimi cümle-i tevâbi‘ ve levâhıkı ile ve yine karye-i mezbûre bağları dâhilinde vâki‘ lede’l-ahâlî ma‘lûmü’l-hudûd otuz çapalık bir kıt‘a mülk bağımı ve yine karye-i merkūme sınırı kurbunda İstirkor nâm mevzi‘de vâki‘ lede’l-ahâlî ve’l-cîrân ma‘lûmü’l-hudûd bir kıt‘a mülk çayırımı safka-i vâhide ile mezbûr Mano’ya yirmi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mahdûdeleri mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ât mezbûr Mano’nun mülk-i müşterâ-yı sarîhidir keyfe mâ yeşâ ve yahtâr ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Mano bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Cemâziyelevvel li sene tis‘a ve ışrîn ba‘de’l-elf. Şuhûdü’l-hâl: Memi Bey b. Mustafa el-Cündî Mehmed Efendi el-Müderris, Murad Bey b. Hızır el-Cündî Hasan Beşe b. Abdullah el-Cündî Osman Beşe b. Abdullah er-Râcil.