Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 180 Hüküm no: 173 Orijinal metin no: [25(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed ve Halime bt. Abdullah’ın İbrahim Dede aleyhine açtıkları alacak davasında iddialarını ispat edemedikleri Medîne-i (…) mahallâtından (…) anhu Rabbühü’l-Bârî (…) Ayşe bt. Mehmed ve Halime bt. Abdullah nâm hâtunlar meclis-i şer‘-i hatîr-i lâzımü’t-tevkīrde fahrü’l-(…) İbrahim Dede b. Mahmud nâm kimesneyi ihzâr ve mahzarında her biri takrîr-i da‘vâ edip mezbûr İbrahim Dede zimmetinde beynimizde ma‘lûm menâzil ve dükkân icâresinden yirmi bin nakd fıddî-i Osmanî râyic fi’l-vakt akçe hakkımız vardır suâl olunup bi hasebi’ş-şer‘i’ş-şerîf ihkāk-ı hak olunmak matlûbumdur dediklerinde gıbbe’s-suâl mezbûr İbrahim Dede fi’l-hakīka mezbûretân Ayşe ve Halime bundan akdem benden kendi zu‘mları üzre yirmi bin akçe menzil ve dükkân icâresi da‘vâ ve taleb edip ben dahi inkâr etmekle beynimize muslihûn tavassut edip sümme inkâr sâbıkan medîne-i mezbûrede hâkimü’ş-şer‘ olan a‘lemü’l-ulemâ’i’l-izâm Hüsameddin Efendi b. Ali hazretleri huzûrunda bin nakd-i mezbûrü’n-na‘t akçe üzre müsâlaha olduk deyû sene seb‘a ve ışrîn ve elf târihiyle müverraha ve mûmâ-ileyh efendi hazretlerinin hat ve hatmini müştemile hüccet-i şer‘iyye ibrâz edip nazar olundukda fi’l-vâki‘ mazmûn-ı hüccet mezbûr İbrahim Dede’nin takrîrine muvâfık ve mutâbık oldukdan sonra merkūmetân Ayşe ve Halime mazmûn-ı hücceti bi’l-külliye inkâr edicek mezbûr İbrahim Dede’den sıdk-ı kelâmını mübeyyine beyyine talebe olundukda udûl-i müslimînden târih-i mezbûrda mûmâ-ileyh efendi hazretlerinin çukadârı olan İbrahim Beşe b. Veli ve mahkeme-i kübrâ hüddâmından Süleyman b. Turgud ve Mustafa b. Mehmed ve Yusuf b. Abdullah nâm kimesne[ler] li ecli’ş-şehâde meclis-i şer‘a hâzırûn olup fi’l-vâki‘ mezbûretân Ayşe ve Halime mezbûr İbrahim Dede’den yirmi bin nakd-i mezbûrü’n-na‘t akçe da‘vâ ve taleb edip ol dahi inkâr etmekle ba‘de’l-münâza‘a beynlerine muslihûn tavassut edip bin nakd-i mezbûrü’n-na‘t akçe üzre bizim huzûrumuzda müsâlaha oldular bu husûsa minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de ri‘âyeti şerâyiti’l-kabûl mezbûrûnun şehâdetleri hayyiz-i kabûl ve mahall-i irtizâda vâkı‘a olduklarından sonra mezbûretân Ayşe ve Halime husûs-ı mezbûra müte‘allik mezbûr İbrahim Dede’ye mu‘ârazadan men‘ olunup mâ hüve’l-vâki‘ bi’t-taleb ketb olundu. Hurrire fî’l-yevmi’s-sânî min Cumâdelûlâ li sene tis‘a ve ışrîn ve elf. Şuhûdü’l-hâl: Mustafa b. Mehmed, Süleyman b. Turgud, Ali b. Abdullah, Ali b. Abdullah, Perviz b. Abdullah, muharriru’l-hurûf Mehmed Efendi b. el-merhûm Esedüddin.