Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 196 Hüküm no: 198 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemihan bt. Mehmed’in menziline Mehmed b. Nasuh’un haksız yere müdahale etmesi Mahmiye-i Kostantıniyye -humiyet ani’l-âfât ve’l-beliyye-de Balat kurbunda vâki‘ Tahtaminâre mahallesi sâkinelerinden İstemihan Hâtun bt. Mehmed nâm hâtun meclis-i şer‘-i hatîr-i lâzımü’t-tevkīrde Mehmed b. Nasuh nâm kimesne mahzarında takrîr-i da‘vâ edip mezbûr Mehmed medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Evlice Baba mahallesinde vâki‘ lede’l-ahâlî ve’l-cîrân ma‘lûmü’l-hudûd mülk menzilime bi gayrı vech-i şer‘î vaz‘-ı yed edip tasarrufuma mâni‘ olup bi hasebi’ş-şer‘i’ş-şerîf suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Mehmed cevâbında benim zikr olunan menzil-i mezbûrda bi vechin min külli’l-vücûh medhal ve alâkam yokdur deyicek menzil-i mezbûrdan merkūm Mehmed’in kasr-ı yedine tenbîh birle mâ hüve’l-vâki‘ bi’t-taleb ketb ve imlâ ve tahrîr inşâ olunup yed-i tâlibe def‘ ve vaz‘ olundu lede’l-ihtiyâc ibrâz ve ihticâc edine. Hurrire fi’l-yevmi’l-ışrîn li târihi’l-mezbûr. Şuhûdü’l-hâl: Mustafa b. Surûrî, Ramazan b. Mehmed, Mustafa b. Mehmed, Ali b. Abdullah, Yakub b. Kurd, Perviz b. Abdullah ve gayruhüm mine’l-hâzırîn.