Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 195 Hüküm no: 197 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’ın arsasını Rahime bt. Ali’ye satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Otakçıbaşı mahallesi sâkinlerinden Yusuf b. Abdullah nâm kimesne meclis-i şer‘-i şerîfde işbu hâmiletü hâze’l-kitâb Rahime Hâtun bt. Ali mahzarında ikrâr ve takrîr-i kelâm edip mahalle-i mezbûrede vâki‘ bir tarafdan İbrahim Halîfe b. Abdullah mülküne ve bir tarafdan Musli Çelebi çayırına ve bir tarafdan Yasemin bt. Abdullah vakfı’na ve bir tarafdan yine müşterî-i mezbûre mülküne müntehî eşcâr-ı müsmire ve gayr-ı müsmireyi hâvî cüneyneyi müştemil mülk arz-ı hâliyemi mezbûre Rahime Hâtun’a bin yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘-i mahdûd eyledim ba‘de’l-yevm sâlifü’l-beyân hudûd ile mahdûd olan arz-ı hâliye merkūme Rahime Hâtun’un mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıfe olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûre Rahime bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min şehri Cemâziyelevvel li sene tis‘a ve ışrîn ve elf. Şuhûdü’l-hâl: Allahkulu b. Abdullah, Ali b. İlyas, Ferhad b. İsmail, Hasan b. İsmail, Murad Dede, Mustafa b. Receb, Hasan el-Müezzin, Osman b. Abdullah.