Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 197 Hüküm no: 200 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hüseyin’in harap bağ yerini Mehmed Dede b. Seyyid Hasan’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Evlice Baba mahallesi sükkânından fahrü’l-akrân Mehmed Bey b. Hüseyin nâm cündî meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb fahrü’d-dervişân Mehmed Dede b. es-Seyyid Hasan mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Ferhad b. Bayram mülküne ve bir tarafdan Yırtılmaz Mehmed Bey mülküne ve bir tarafdan yine kendi mülküme müntehî ve bir tarafdan tarîk-i âma müntehî tahmînen bir dönüm bir kıt‘a harâbe mülk bağ yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Mehmed Dede’ye üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân harâbe mülk bağ yeri mezbûr Mehmed Dede’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Mehmed Dede bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mahmud Efendi b. Mehmed el-İmâm, Mustafa Çelebi b. Ali Çukadâr, Hüseyin b. Abdullah el-Müezzin, Abdurrahman b. Mehmed, Ali b. Abdullah, Mustafa b. Mehmed, Süleyman b. Turgud, Yakub b. Kurd ve gayruhüm.