Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 197 Hüküm no: 201 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâkine bt. Derviş’in menzilini Ali Beşe b. Abdullah’a satması Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Evlice Baba mahallesi sâkinelerinden Sâkine bt. Derviş nâm hâtun meclis-i şer‘-i hatîr-i lâzımü’t-tevkīrde hâlâ zevci olan işbu hâfız-ı hâze’l-kitâb Ali Beşe b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Çavuşköyü demekle ma‘rûfe karyede vâki‘ bir tarafdan Ahmed Ağa çiftliğine ve bir tarafdan Ahmed Beşe b. Abdullah mülküne ve bir tarafdan vâdiye ve bir tarafdan tarîk-i âma müntehî iki tahtânî beyti müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Ali Beşe’ye üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen kıldım ba‘de’l-yevm sâlifü’l-[beyân] menzil-i mahdûd mezkûr Ali Beşe’nin mülk-i müşterâ-yı sarîhidir keyfe mâ yeşâ ve yürîd mutasarrıf olsun dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûr Ali Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire [fi’t-târihi’l-mezbûr.] Şuhûdü’l-hâl: es-Sâbıkūn.