.:: İstanbul Kadı Sicilleri ::.


Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620)
cilt: 24, sayfa: 200
Hüküm no: 204
Orijinal metin no: [30a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şeyh Mehmed b. Seyyid Hasan’ın menzilini Ahmed b. Abdullah’a satması

Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Evlice Baba mahallesi sâkinlerinden eş-Şeyh Mehmed b. es-Seyyid Hasan meclis-i şer‘-i şerîfde işbu hâmilü’l-kitâb Ahmed b. Abdullah mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Fâtıma Hâtun vakfı’na ve bir tarafdan Semercioğlu Ali mülküne ve bir tarafdan hamal Hamza mülküne ve bir tarafdan Debbâğ Mehmed mülküne müntehî bir fevkānî beyti ve bir tahtânî beyti ve matbahı ve bi’r-i mâyı ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Ahmed’e yedi bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘-i mahdûd eyledim ba‘de’l-yevm sâlifü’l-beyân menzil-i mezbûr merkūm Ahmed’in mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Ahmed bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Yed-i tâlibe def‘ olundu.


Hurrire fi’l-yevmi’r-râbi‘ ve’l-ışrîn min şehri Cemâziyelevvel li sene tis‘a ve ışrîn ve elf.


Şuhûdü’l-hâl: Mahmud Efendi b. Mehmed el-İmâm, Hüseyin b. Abdullah el-Müezzin, Mustafa Beşe b. Abdullah er-Râcil, Mehmed Çelebi b. Nasuh.