Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 201 Hüküm no: 206 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanya’daki bağın Panayot’a satılması Vilâyet-i Rumeli’nde Yanya sancağında nefs-i kazâ-i Bard[onya] (...) meclis-i şer‘-i hatîr-i lâzımü’t-tevkīrde işbu râfi‘ü’l-kitâb Panayot (...) muvâcehesinde bi’t-tav‘ ve’r-rızâ ikrâr ve takrîr-i kelâm edip kazâ-i mezbûr (...) demekle ma‘rûf mevzi‘de vâki‘ bir tarafdan Apostol v. Maravili bağına ve bir tarafdan Apostol v. Lamari bağına ve bir tarafdan Andriye v. ( ) nâm papuççu bağına ve bir tarafdan tarîk-i âma müntehî ve mahdûd tahmînen dört dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mesfûr Panayot’a dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı mezkûr Panayot’un mülk-i müşterâ-yı sarîhidir keyfe mâ yeşâ mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Panayot vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı târihi’l-mezbûr. Şuhûdü’l-hâl: Ayaz Bey b. Abdullah el-Cündî Mehmed Beşe b. Abdullah el-Bevvâbü’s-sultânî, Mustafa b. Mehmed, Yakub b. Kurd, Köhari v. Yorgi, Minho v. Dimo, Yani v. Yorgi, Yorgo v. Varvari, Yani v. Façili ve gayruhüm mine’l-hâzırîn.