Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 201 Hüküm no: 207 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ Hâtun bt. Ali Çelebi ile kız kardeşinin Emine Hâtun bt. Abdullah’a bazı emlâkini satması Emine Hâtun’un çiftlik hüccetidir. Havâss-ı Sultâniyye kazâsı müzâfâtından Çatalca nâhiyesine tâbi‘ İlbasan nâm karye sâkinelerinden Hümâ Hâtun bt. Ali Çelebi tarafından husûs-ı âti’l-beyânı ikrâra vekîli olup hasm-ı şer‘î-i câhid mahzarında müvekkile-i merkūme Hümâ Hâtun’u ma‘rifet-i şer‘iyye ile ârifân olan Mehmed Bey b. Abdullah el-Cündî ve Mustafa b. Abdullah şehâdetleri ile şer‘an sâbite olan zevci Ali Bey b. Abdullah el-Cündî ve merkūme Hümâ Hâtun’un li ebeveyn kız karındaşı Ayşe bt. Ali Çelebi tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında kezâlik yine şâhidân-ı mezbûrân şehâdetleri ile şer‘an sâbite olan Mehmed Bey b. Abdullah el-Cündî nâm kimesneler meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Emine Hâtun bt. Abdullah nâm hâtun tarafından husûs-ı câ’i’l-beyânı tasdîka vekîli olup vekâleti hasm-ı şer‘î-i câhid mahzarında bimâ hüve en-nehci’l-mu‘teberi’l-mer‘î şer‘an sâbite ve mütehakkika olan merkūme Emine’nin hâlâ zevci fahrü’l-emâcid ve’l-ekârim zübdetü’l-mefâhir ve’l-mekârim Dergâh-ı âlî müteferrikalarından Mehmed Ağa b. Murad nâm kimesne mahzarında bi’l-vekâle her biri ikrâr ve takrîr-i kelâm edip işbu akdin sudûruna değin müvekkiletân-ı mezbûretân Hümâ ve Ayşe’nin ale’l-iştirâk silk-i mülk-i sahîhlerinde münselik olup dört çatma tahtânî beyti ve bir fevkānî beyti ve karye-i merkūmede vâki‘ merhûm babaları Ali Çelebi’den bi hasebi’l-irsi’ş-şer‘î müvekkilelerimize intikāl eden çiftlik demekle ma‘rûf ve iki tarafdan mer‘âya ve iki tarafdan tarîk-i âma müntehî olup ve bir beyti, bir tahtânî odayı ve üç su kuyusunu ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzillerini ve yedi re’s kara sığır öküzü ve beş re’s kara sığır ineği ve sekiz kara sığır danalarını ve yine nâhiye-i mezbûreye tâbi‘ Çakıl nâm karye bağları sınırında merhûm-ı mezbûr Ali Çelebi’den müvekkilelerimize irs-i şer‘le intikāl eden bir tarafdan Yani v. Yorgi bağına ve bir tarafdan Kosta v. Laki bağına ve iki tarafdan tarîk-i âma müntehî bir kıt‘a mülk-i mevrûsları olan bağlarını ve beynlerinde cinsi ve nev‘i ilm-i şer‘î birle ma‘lûm âlât-ı çifti ve esbâb-ı harsı cümle-i tevâbi‘ ve levâhıkı ve kâffe-i menâfi‘ ve merâfıkları ile müvekkile-i mezbûre Emine Hâtun’a bi safkatin vâhidetin yirmi beş bin nakd-i fıddî-i Osmânî râyic fi’l-vakt akçeye bâtten bey‘ ve teslîm-i mebî‘ât-ı mezkûre edip meblağ-ı mezbûr yirmi beş bin akçeyi alâ sebîli’l-münâsafa müvekkile-i mezbûre Emine Hâtun’dan ahz ve kabz ettiklerinden sonra yine karye-i merkūme İlbasan sınırında mevâzi‘-i adîdede vâki‘ her biri inde’l-ahâlî ma‘lûmü’l-hudûd olup tahmînen cümlesi yirmi müd tohum istî‘âb eder on kıt‘ası merhûm ve mağfûrun-leh Sultan Bayezid Hân -tâbe serâhu- hazretlerinin arâzi-i mevkūfesinden ve sekiz kıt‘a merhûm Mahmud Paşa’nın arâzi-i mevkūfesinden olup müvekkilelerimiz merkūmetân Hümâ ve Ayşe’nin taht-ı tasarruflarında olan on sekiz kıt‘a tarlaların içinde olan mahsûlâtı ile ma‘an ve yine karye-i merkūme İlbasan kurbunda mevâzi‘-i müteferrikada vâki‘ bir biri inde ahâliyi’l-karye ma‘lûmü’l-hudûd olan beş kıt‘a çayırların dahi hakk-ı tasarruflarını sâhib-i arz ma‘rifetleri ile müvekkile-i mezbûre Emine Hâtun’a tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan on beş bin nakd-i mezbûrü’n-na‘t akçeyi müvekkile-i mezbûre Emine Hâtun yedinden alâ sebîli’l-münâsafa bi’t-tamâm ve’l-kemâl ahz ve kabz eylediler ba‘de’l-yevm sâlifü’l-beyân mebî‘ler müvekkile-i mezbûre Emine Hâtun’un mülk-i müşterâ-yı sarîhidir ve mârrü’z-zikr on sekiz kıt‘a tarlaların ve beş kıt‘a çayırın dahi hakk-ı tasarrufları müvekkile-i müşârün-ileyhâ Emine Hâtun’undur sâir emsâli tasarrufları gibi keyfe mâ yeşâ ve hasbe mâ yürîd mutasarrıfe olsun dedikde vekîlân-ı mezbûrân Ali ve Mehmed’in minvâl-i muharrer üzre cârî olan ikrâr ve takrîrlerin vekîl-i mûmâ-ileyh Mehmed Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb ve imlâ ve tahrîr ve inşâ olunup yed-i tâlibine def‘ ve vaz‘ olundu. Hurrire fi’t-târihi’l-mezbûr. Şuhûdü’l-hâl: [31a] (...) Abdullah b. Hüseyin el-Cündî Ali b. Yusuf el-Müezzin, Ali Bey b. Abdullah el-Cündî Mehmed Bey b. Abdullah el-Bevvâbü’s-sultânî, Muzaffer b. Abdullah, Mehmed b. Hüseyin er-Râcil, Ali Bey b. Abdullah el-Cündî Kadir b. Abdullah el-Cündî Mehmed Bey b. ( ) el-Cündî Ali b. Abdullah, Süleyman b. Turgud ve gayruhüm mine’l-hâzırîn.