Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 206 Hüküm no: 212 Orijinal metin no: [31b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Abdullah’ın menzilinin beytülmâl tarafından Mehmed Bey b. Abdullah’a satılması Müsveddede kalmakla bu mahalle kayd olundu. Bi’l-fi‘l Istabl-ı âmire beytülmâl emîni olan fahrü’l-akrân Mahmud Bey b. Mehmed meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mehmed Bey b. Abdullah nâm bevvâb-ı sultânî mahzarında bi’t-tav‘ ve’r-rızâ ikrâr ve takrîr-i kelâm edip bundan akdem Havâss-ı Aliyye kazâsı müzâfâtından Çatalca nâhiyesine tâbi‘ Marmaracık demekle ma‘rûf karyede fevt olup zâhirde vâris-i ma‘rûfu olmamağla cümle metrûkâtı cânib-i beytülmâle âid olan Mahmud b. Abdullah nâm Gürcü’nün muhallefâtından karye-i merkūmede vâki‘ bir tarafdan Pervâne b. Memi mülküne ve bir tarafdan Kasım b. Abdullah mülküne ve bir tarafdan ( ) nâm yesârî mülküne ve bir tarafdan tarîk-i âma müntehî ve mahdûd bir tahtânî beyti ve bi’r-i mâyı ve zât-ı eşcâr-ı müsmireyi hâvî cüneyneyi müştemil [menzili] cümle-i tevâbi‘ ve levâhıkı ve kâffe-i menâfi‘ ve merâfıkı ile sûk-ı sultânîde beyne’t-tâlibîn ve’r-râgıbîn kirâren müzâyede olundukda sekiz yüz akçede mezbûr Mehmed Bey’in üzerinde karâr edip bir akçe ziyâde ile âhar tâlibi ve harîdârı olmamağın menzil-i mezbûru merkūm Mehmed Bey’e meblağ-ı mersûm sekiz yüz nakd-i fıddî-i Osmânî râyic fi’l-vakt akçeye emânet-i mahkiyem hasebiyle bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd merkūm Mehmed Bey’in mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr [32a] [vicâhen tasdîk] edicek mâ hüve’l-vâki‘ bi’t-taleb ketb olundu. Hurrire fî gurreti Cemâziyelevvel li târihi’l-mezbûr. Şuhûdü’l-hâl: Mahmud b. Ali, Fethullah el-Bevvâbü’s-sultânî, Ali b. Abdullah, Mustafa Bey b. Abdullah el-Cündî Mustafa b. Mehmed, Ali b. Abdullah, Mahmud Halîfe b. Ahmed el-İmâm, Perviz b. Abdullah.