Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 206 Hüküm no: 211 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Kaya Vakfı’na ait mumcu dükkânının bir miktar hissesinin Apostol v. Dimo’ya kiralanması Mahmiye-i Kostantıniyye -humiyet ani’l-âfât- hısnı ebvâbından Yenikapı hâricinde merhûm İlyaszâde mahallesi ahâlîsinden Bayram b. el-Hâc Kaya ve Sâkine bt. Kaya nâm ve İsmail b. Mustafa nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Apostol v. Dimo nâm zimmî muvâcehesinde her biri takrîr-i kelâm edip merhûm-ı mezbûr el-Hâc Kaya’nın vakfı’ndan olup selhâne kurbunda vâki‘ iki tarafdan Pervâne Çavuş mülküne ve bir tarafdan tarîk-i hâssa ve bir tarafdan tarîk-i âma müntehî evlâda meşrûta olan vakıf mumcu dükkânının rub‘u mu‘ayyen ve mümtâz evlâd-ı vâkıfdan olduğumuz cihetden mezbûr Apostol’e bin akçe icâre-i mu‘accele ve beher mâh otuz akçe icâre-i müeccele ile cemî‘ meremmâtı kendi malından olmak üzre ale’l-iştirâk îcâr edip ol dahi minvâl-i muharrer üzre istîcâr ve kabûl eyledi dediklerinde mukırrûn-ı mezbûrûnun vech-i mübeyyen üzre cârî olan ikrâr ve takrîrlerin el-mukarru lehü’l-mezbûr Apostol bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Sefer Bey b. ( ) el-Cündî Mehmed Çelebi b. Pervâne el-Müezzin, Receb Halîfe b. ( ) el-Müezzin, İbrahim Beşe b. Abdullah er-Râcil, Ali Çelebi b. ( ) el-İmâm, Mustafa b. Mehmed, Yakub b. Kurd, Ali b. Abdullah ve gayruhüm mine’l-hâzırîn.