Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 208 Hüküm no: 214 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köni’nin oğulları Yorgi ve Yani’nin değirmen hissesinin bir kısmını Simo v. Duka’ya satmaları Vilâyet-i Rumeli’nde Avlonya sancağında Ergirikasrı kazâsına tâbi‘ Sinagobli [Sinagopolos] nâm karye sâkinlerinden Yorgi ve Yani veledey Köni nâm zimmîler meclis-i şer‘-i hatîr-i lâzımü’t-tevkīrde işbu râfi‘ü hâze’l-kitâb Simo v. Duka nâm zimmî muvâcehesinde her biri ikrâr ve takrîr-i kelâm edip karye-i merkūme kurbunda Suvak? nâm mevzi‘de vâki‘ nehr-i cârîde dâir bir göz mülk değirmenden ikimize isâbet eden dört hissede bir hisse-i şer‘iyye-i şâyi‘alarımızı cümle-i tevâbi‘iyle mezbûr Simo’ya dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledik ba‘de’l-yevm sâlifü’l-beyân değirmenden ikimize isâbet eden dört hissede bir hisse-i şer‘iyye-i şâyi‘amız mezbûr Simo’nun mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırrân-ı mezbûrânın vech-i mübeyyen üzre cârî olan ikrâr ve takrîrlerin el-mukarru lehü’l-mezbûr Simo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Cumâdelâhire li’s-seneti’l-merkūme. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Dimo v. Niko, Nikola v. Lika, Dimo v. Körki, Dimo v. Yorgo, Kiro v. Niko, Dimo v. Simo, Minho v. Dimo.