Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 208 Hüküm no: 215 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sütçü Yani’nin cesedinin muayenesi Bi’l-fi‘l medîne-i Ebâ Eyyûb-i Ensârî -râdiye anhu Rabbühü’l-Bârî-’de za‘îmü’l-vakt olan Abdullah Bey b. Hüseyin ve yoğurtçular kethüdâsı olan el-Hâc Mustafa b. Mehmed meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr-i merâm edip bundan akdem birkaç def‘a medîne-i merkūme kurbunda Eflah kapısı’na karîb Dörtyolağzı demekle ma‘rûf mevzi‘de ba‘zı eşkıyâ medîne-i merkūmeye süt getirip sütçülerin yoluna inip kimisini darb ve kimisinin cebren sütünü yağma edip firâr ederler idi hâlâ yine mevzi‘-i merkūmda târih-i kitâb günü Ahmed nâm kimesne dört nefer yoldaşı ile Hancova-i Kübrâ’da sütçülerimizin yoluna inip içlerinden Yani nâm sütçüyü katl eylemişler kıbel-i şer‘den üzerine varılıp eser-i cerâhati keşf ve tahrîr olunmak matlûbumuzdur dediklerinde cânib-i şer‘-i mutahhardan mevlânâ es-Seyyid Şeyh Mehmed Efendi b. Hüsameddin irsâl olunup ol dahi zeyl-i kitâbda mastûrü’l-esâmî olan müslimîn ile mahall-i merkūma varıp mürd-i mezbûrun beden-i nâ-pâkine nazar ettiklerinde sol böğründe âlet-i cârih olan bıçak yarasından maktûl olduğu mu‘âyeneten müşâhede olundukdan sonra ahz olunan merkūm Ahmed’den hakīkat-i hâli istintâk ettiklerinde mezbûr Ahmed feth-i makāl edip fi’l-vâki‘ mârrü’z-zikr mevzi‘-i merkūmda târih-i kitâb günü Hancova-i Kübrâ’da işbu gāib ani’l-meclis olan Musli ve Ahmed ve Mehmed ve Çapadilsiz Ağa’nın bir kara sarıklı hizmetkârı ile giderken merkūm Çapadilsiz Ağa’nın hizmetkârı Karabaş mürd-i mezbûru bıçak ile urup ve katl eyledi deyû haber verdikden sonra vâki‘ hâli mevlânâ-yı mezbûr mahallinde tahrîr edip ba‘dehû gelip meclis-i şer‘de ihbâr etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min Cumâdelâhire li târihi’l-mezbûr. Şuhûdü’l-hâl: Ahmed Beşe b. Abdullah, Hasan b. Abdullah, Bayram b. Abdullah, Sinan b. Mehmed, Mustafa b. Ali, Abdünnebi b. Nebi, Ali b. Abdullah, Halil b. Abdullah, Ali b. Abdullah, Hasan b. Abdullah, Mehmed b. Abdullah, Mehmed b. Bayram ve gayruhüm.