Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 210 Hüküm no: 217 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Biyo v. Decko’nun Göka v. Petro’ya bazı emlâkini satıp bazılarının da kullanım hakkını devretmesi Vilâyet-i Rumeli’nden Avlonya sancağında Premedi kazâsına tâbi‘ Şayani nâm karyeden Biyo v. Decko nâm zimmî meclis-i şer‘-i şerîfde işbu hâmil-i hâze’l-kitâb Göka v. Petro tâbi‘ zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Göka v. Petro mülküne ve bir tarafdan Yuvan v. Dedo mülküne ve iki tarafdan tarîk-i âma müntehî ve mahdûd bir tahtânî beyti ve yine karye-i merkūme kurbunda vâki‘ lede’l-ahâlî ve’l-cîrân ma‘lûmü’l-hudûd tahmînen bir çapalık bir kıt‘a mülk bağımı ve yine karye-i merkūme kurbunda lede’l-ahâlî ma‘lûmü’l-hudûd tahmînen bir çapalık mülk bostanımı, cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Göka’ya bi safkatin vâhidetin üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde vâki‘ tahmînen diyârımız keyli ile üç keyl tohum istî‘âb eder taht-ı tasarrufumda olan on üç kıt‘a tarlaların hakk-ı tasarrufunu sâhib-i arz ma‘rifetiyle merkūm Göka’ya tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan üç bin nakd-i mezbûrü’n-na‘t akçeyi merkūm Göka yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân emlâk merkūm Göka’nın mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları merkūmundur, sâir emsâli tasarrufları gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Göka bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min Cumâdelâhire li sene tis‘a ve ışrîn ba‘de’l-elf. Şuhûdü’l-hâl: Koçi b. Ali, Sinan b. Ahmed, Mehmed b. Abdullah, Ahmed Beşe b. Hasan er-Râcil, Mustafa b. Mehmed.