Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 213 Hüküm no: 222 Orijinal metin no: [33a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kondi’nin oğulları Foti, Köko ve Dimo’nun bağlarını Koçi v. Dimo’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Libohova nâm karyesi mahallâtından Marina mahallesi sâkinlerinden Foti ve Köko ve Dimo evlâd-ı Kondi nâm zimmîler meclis-i şer‘-i hatîr-i lâzımü’t-tevkīrde işbu hâmilü’l-kitâb Koçi v. Dimo nâm [zimmî] muvâcehesinde her biri ikrâr ve takrîr-i kelâm edip karye-i merkūme bağları dâhilinde Revâni demekle ma‘rûf mevzi‘de vâki‘ bir tarafdan yine müşterî-i mezbûr bağına ve bir tarafdan Mihal v. ( ) bağına ve bir tarafdan Dedo v. Kiro bağına ve bir tarafdan Mekşo v. Mekşo bağına müntehî ve mahdûd tahmînen on çapalık bir kıt‘a mülk bağımızı cümle-i tevâbi‘ ve levâhıkı ile mesfûr Koçi’ye yedi bin nakd-i fıddî-i Osmânî râyic fi’l-vakt akçeye bâtten bey‘ edip mebî‘-i mezkûru mahallinde kabza müşterî-i merkūmu taslît eylediğimizden sonra meblağ-ı merkūm yedi bin akçeyi mezbûr Koçi yedinden ale’l-iştirâk bi’t-tamâm ve’l-kemâl ahz ve kabz eyledik ba‘de’l-yevm sâlifü’l-beyân bağ-ı mahdûd mezkûr Koçi’nin mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dediklerinde gıbbe’t-tasdîk ketb olundu. Hurrire fî 5 min Cumâdelâhire li’s-seneti’l-merkūme. Şuhûdü’l-hâl: Memişah Çelebi b. Kasım, Hasan Çelebi b. Kasım, Zeynel Çelebi b. Kasım, Hüseyin Çelebi b. Kasım, Mustafa Çavuş eş-şehîr bi Şeyhzâde, Yorgo [v.] Kirko, Kiro [v.] Kondi, Göka [v.] Nika, Kirko [v.] Andriye, Kiro [v.] Kika, Deriçe [v.] Nika, Kika [v.] Hristo, Dimo [v.] Pano, Nikola [v.] Dimo ve gayruhüm mine’l-hâzırîn.