Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 212 Hüküm no: 221 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avyaro v. Andriye’nin bazı emlâkini Nikola v. Dimitri’ye satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Büyük Kerasova nâm karyeden Avyaro v. Andriye nâm zimmî meclis-i şer‘-i hatîr-i lâzımü’t-tevkīrde işbu hâfız-ı hâze’l-kitâb Nikola v. Dimitri nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme bağları dâhilinde Makapolayi demekle ma‘rûf mevzi‘de vâki‘ bir tarafdan Rizo v. Panayot bağına ve bir tarafdan İsteryano v. Kondi bağına ve bir tarafdan vâdiye ve bir tarafdan tarîk-i âma müntehî tahmînen on sekiz dönüm bir kıt‘a mülk bağımı ve yine bağ-ı mezbûra muttasıl ve mülâsık bir kıt‘a samanlığı ve şırahâneyi cümle-i tevâbi‘ ve levâhıkı ve kâffe-i menâfi‘ ve merâfıkı ile bi safkatin vâhidetin mezbûr Nikola’ya üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûreyi mahallinde kabza müşterî-i merkūmu taslît eyledim ba‘de’l-yevm sâlifü’l-beyân mebî‘ler mezbûr Nikola’nın mülk-i müşterâ-yı sarîhidir keyfe mâ yeşâ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Nikola bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Süleyman b. Turgud, Anastaş v. Mihal, Nikola [v.] İstemad, Dimitri [v.] İstanaki, Yorgi v. Mihal, Şilo v. Dimitri, Mihal [v.] İstemad, Şilo v. Mihal, Yani [v.] Dinoz, Rizo v. Nikola, Dimitri [v.] Yani, Nikola [v.] İstemad, İskarlet [v.] Yani, Direko v. Kado, İsteryano [v.] Aleksi, Minho v. Yani ve gayruhüm mine’l-hâzırîn.