Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 177 Hüküm no: 143 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. el-Hâc Ali’nin ölen Hasan Ağa’daki alacağını kefillerinden tahsili Mahmiye-i İstanbul’da merhûm Şeyh Ebülvefâ câmi‘-i şerîfi ve ma‘bed-i latîfi kurbunda Dâye Hâtun mahallesi sâkinlerinden bâ‘isü’l-kitâb es-Seyyid Mustafa b. el-Hâc Ali nâm kimesne meclis-i şer‘-i şerîfde Aslan v. Marat nâm zimmî mahzarında üzerine da‘vâ ve takrîr-i kelâm edip mahmiye-i mezbûrede Kumkapı kurbunda Nişancı Paşa-yı Atîk mahallesinde sâkin iken vefât eden Hasan Ağa b. ( ) nâm kimesne zimmetinde cihet-i karzdan ve tülbent bahâsından hakkım olan bin esedî guruşa merkūm Aslan ile karındaşı Kazeros nâm zimmîden her biri emr ve kabûlü hâviye kefâlet-i sahîha-i şer‘iyye ile kefîl olmuşlar idi, suâl olunup kefâlet-i mezkûresine binâen meblağ-ı mezkûrun merkūm Aslan’dan alıverilmesi matlûbumdur dedikde, gıbbe’s-suâl mezbûr Aslan kaziyye minvâl-i muharrer üzre olup cihet-i kefâletden müdde‘î-i mezbûra bin esedî guruş deyni olduğunu bi tav‘ihî ikrâr etmeğin alâ mûceb-i ikrârihî meblağ-ı mezbûr bin kıt‘a esedî guruşu müdde‘î-i mezbûr es-Seyyid Mustafa’ya edâ ve teslîme merkūm Aslan’a ba‘de’t-tenbîh mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Ahmed, Mehmed Bey b. Ramazan.