Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 176 Hüküm no: 142 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ahmed b. Hasan’ın, değirmen ve içindeki eşyalarını el-Hâc Mustafa Çelebi b. el-Hâc Mustafa’ya sattığı Mahmiye-i İstanbul’da Sultan Selim Hân câmi‘-i şerîfi kurbunda Beyceğiz mahallesi sükkânından el-Hâc Ahmed b. Hasan nâm kimesne meclis-i şer‘-i hatîrde umdetü’l-eşbâh bâ‘is-i hâze’l-kitâb el-Hâc Mustafa Çelebi b. el-Hâc Mustafa mahzarında bi’t-tav‘i’s-sâf ikrâr ve i‘tirâf edip mahmiye-i mezbûrede Aksaray kurbunda Murad Paşa-yı Atîk mahallesinde hamam kurbunda vâki‘ Mehmed Ağa değirmeni içinde mevcûd olup akd-i âtînin sudûruna değin yedimde mülküm olan beynimizde ma‘lûm bir çift değirmen taşımı ve dokuz bârgir ve beş elek ve iki kalbur ve dört çift çuval ve beynimizde ma‘lûm değirmen bârgiri âlâtımı mûmâ-ileyh Hacı Mustafa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile on yedi bin akçeye bey‘ ve teslîm ol dahi iştirâ ve tesellüm eyledikden sonra semen-i mezbûru yedinden tamâmen ahz eyledim, min ba‘d zikr olunan bârgirler ile eşyâ-i mezbûre mûmâ-ileyh Hacı Mustafa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Hurrire fi’l-yevmi’s-sânî min Cumâdelûlâ li sene seb‘a ve seb‘în ve elf. Şuhûdü’l-hâl: Mehmed Beşe b. Âbidin, Ahmed Beşe b. Abdullah, Osman Efendi b. Mehmed, Halil Beşe, Mehmed Beşe b. Ali.