Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 214 Hüküm no: 224 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasan b. Mehmed’in babasından kalan menzilin kız kardeşi Emine’ye ait olduğu ve onun da menzili kocası Ahmed’e hibe ettiği
Havâss-ı Aliyye kazâsı müzâfâtından Terkos nâhiyesine tâbi‘ Cebeciköyü demekle ma‘rûf karye sâkinlerinden Hasan b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip bundan akdem babam merhûm-ı mezbûr Mehmed fevt oldukda verâseti bana ve li ebeveyn kız karındaşım merkūme Emine’ye münhasıra olmağın müteveffâ-yı mezbûrun terekesinden olup ba‘de’t-taksîmi’ş-şer‘î karye-i merkūmede vâki‘ bir tarafdan Hasan Bey b. Abdullah mülküne ve bir tarafdan arâzi-i sultâniyyeye ve bir tarafdan vâdiye ve bir tarafdan tarîk-i âma müntehî bir tahtânî beyti ve bi’r-i mâyı ve muhavvatayı müştemil olan menzil merkūme Emine’nin hisse-i şer‘iyye-i mevrûsesine isâbet ettiği ecilden menzil-i mezbûru merkūme Emine zevci mezbûr Ahmed’e hibe-i sahîha-i şer‘iyye ile hibe ve temlîk ve teslîm eyleyip ol dahi meclis-i hibede kabz ve teslîm eylemiş min ba‘d menzil-i mahdûd-ı mezbûrda medhal ve alâkam yokdur mezbûre Emine’nin bi hasebi’l-irsi’ş-şer‘î intikāl eden hisse-i şer‘iyye-i mevrûsesidir dedikde mukırr-ı mezbûrun minvâl-i muharrer üzre cârî olan ikrâr ve takrîrin mezbûrân Ahmed ve Ayşe [Emine] bi’l-muvâcehe tasdîk ve bi’l-müşâfehe tahkīk ettiklerinde mâ hüve’l-vâki‘ bi’t-taleb ketb olundu.
Hurrire fi’l-yevmi’s-sâmin ve’l-ışrîn min Cemâziyelevvel li târihi’l-mezbûr.
Şuhûdü’l-hâl: Mustafa Çelebi b. Ahmed Çukadâr, Hüseyin Ağa b. Abdullah, Ahmed b. Abdullah, Mehmed b. ( ), Perviz b. Abdullah, Ali b. Abdullah, Mustafa b. Mehmed ve gayruhüm.
|